Губазікаўцы заявілі пра затрыманне нацыстаў-паганцаў з БЧБ-сімволікай
Губазікаўцы затрымалі трох жыхароў Магілёва. Па версіі сілавікоў, маладзёны стварылі сетку тэлеграм-каналаў, дзе прапагандавалі нацысцкую ідэалогію. «Наведвалі тэрыторыі цэркваў і касцёлаў з самаробнымі мячамі для застрашвання вернікаў Магілёва», — паведамляе МУС. На відэа затрымання паказалі бел-чырвона-белы сцяг.
Губазікаўцамі затрыманы 21‑гадовы жыхар Магілёва, які, па іх словах, стварыў і адміністраваў тэлеграм-канал, што прапагандаваў і ўсхваляў нацызм. Аўдыторыя канала складала паўтары тысячы падпісчыкаў.
У часе разбіральніцтва сілавікі выявілі яшчэ двух жыхароў Магілёва, якія «таксама прытрымліваліся нацысцкай ідэалогіі і былі стваральнікамі аналагічных рэсурсаў».
«Мужчыны адносілі сябе да язычнікаў, не прызнавалі традыцыйныя каштоўнасці, святкавалі дзень нараджэння Гітлера, адмаўлялі Дзень Перамогі. Наведвалі тэрыторыі цэркваў і касцёлаў з самаробнымі мячамі для застрашвання вернікаў Магілёва», — заяўляе МУС.
Пры сілавой падтрымцы атрада спецпрызначэння ўнутраных войскаў МУС «Гром» фігурантаў справы затрымалі.
Па месцах іх пражывання выяўлены і канфіскаваны нацысцкія сцягі, літаратура, якая прапаведуе нацызм, незарэгістраваная сімволіка, а таксама інструкцыі па выбуховай справе і халодная зброя, сцвярджае МУС. У відэа паказаны заблюраны бел-чырвона-белы сцяг.
Выяўленыя тэлеграм-каналы прызналі экстрэмісцкімі матэрыяламі.
Заведзены крымінальныя справы за рэабілітацыю нацызму, адмаўленне генацыду беларускага народа, а таксама за стварэнне экстрэмісцкага фармавання.
Затрыманым пагражае да 12 гадоў пазбаўлення волі.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары