Выходзіць кіно пра беларусак у палітыцы. Адна з галоўных гераінь — Святлана Ціханоўская
Сусветная прэм’ера стужкі пад назвай «Не створаныя для палітыкі» (Not made for politics) адбудзецца на 29‑м эстонскім кінафестывалі «Цёмныя ночы» (Black Nights). Для рэжысёркі Волі Чайкоўскай гэта дэбютны поўнаметражны дакументальны фільм, над якім яна працавала апошнія пяць гадоў.
Падчас пратэстаў 2020 года рэжысёрка Воля Чайкоўская знаходзілася за мяжой. Там яна актыўна ўдзельнічала ў акцыях салідарнасці. Так Воля сама стала гераіняй уласнага фільма пра беларусак у палітыцы, далучыўшы туды гісторыі яшчэ трох жанчын — Святланы, Надзеі і Машы. Іх мужчыны былі кінутыя ў беларускія турмы, а самі яны былі вымушаныя не толькі несці на сабе цяжар жонак палітвязняў, але і супрацьстаяць дыктатуры Лукашэнкі.
Вядома, аповед пра беларусак у палітыцы не быў бы поўным без гісторыі Святланы Ціханоўскай — менавіта пра яе фігуру і ролю ў палітычных працэсах даведаюцца гледачы стужкі.
«Шкада, што я не магу зняць усіх беларускіх жанчын, якія адыгралі і працягваюць мець падставовую ролю ў беларускай рэвалюцыі! Шкада, што хронаметраж аднаго фільма і мае ўласныя магчымасці так абмежаваныя. Для мяне асабіста гэта стала падарожжам, што змяніла жыццё.
Увесь працэс рэжысуры, прадусавання і выканання мноства іншых роляў у праекце быў неверагодна звілістым, але таксама поўным радасці, ведаў і надзеі. Я спадзяюся, што ў гэтыя нестабільныя і складаныя часы фільм ізноў прыцягне ўвагу да маёй роднай краіны Беларусі, да яе змагання за волю і дэмакратыю, а таксама да жыццёва важнай ролі кожнай жанчыны ў супрацьстаянні патрыярхальнай тыраніі», — выказала надзею рэжысёрка.
Воля Чайкоўская — беларуская кінематаграфістка і арт-менеджарка. Яна арганізоўвае фестываль «Паўночнае ззянне» і з’яўляецца сузаснавальніцай Беларускай незалежнай кінаакадэміі (BIFA). Дарэчы, сёлетняе «Паўночнае ззянне» ў самым разгары — фільмы даступныя для прагляду як афлайн, так і анлайн.
Цяпер чытаюць
Сталі вядомыя падрабязнасці таго, як у В'етнаме затрымалі Верамейчыка21
Каментары