На гэтым тыдні ЗША правядуць выпрабаванне міжкантынентальнай балістычнай ракеты
ЗША рыхтуюцца да запуску міжкантынентальнай балістычнай ракеты Minuteman III, здольнай несці ядзерную боегалоўку, паведамляе Newsweek. Гэта будзе першае выпрабаванне такой амерыканскай ракеты пасля таго, як прэзідэнт ЗША Дональд Трамп заявіў пра намер аднавіць ядзерныя выпрабаванні.
Пуск запланаваны на 5 або 6 лістапада з базы Вандэнберг у штаце Каліфорнія. Ракета, якая не будзе мець ядзернай боегалоўкі, праляціць над Ціхім акіянам і павінна дасягнуць палігона супрацьракетнай абароны на атоле Кваджалейн (Маршалавы астравы).
Minuteman III — гэта цвёрдапаліўная ракета масай каля 36 тон, прынятая на ўзбраенне ЗША яшчэ ў 1970 годзе. На ўзбраенні амерыканскіх войскаў цяпер знаходзіцца каля 400 такіх ракет, і яны рэгулярна мадэрнізуюцца.
У Пентагоне адзначылі, што падобныя пускі праводзяцца некалькі разоў на год і не звязаныя з палітычнымі ці знешнімі абставінамі. Апошнія вучэнні адбыліся ў маі, а летась — двойчы.
Між тым за апошнія тыдні Расія таксама правяла шэраг выпрабаванняў сваіх стратэгічных узбраенняў, у тым ліку ракет «Буравеснік», «Ярс», «Сінява», а таксама тэст падводнага апарата «Пасейдон».
Прэс-сакратар Крамля Дзмітрый Пяскоў заявіў, што Масква «адрэагуе адпаведна сітуацыі», калі ЗША парушаць дзейны мараторый на ядзерныя выпрабаванні.
Цяпер чытаюць
Віктар Лукашэнка засвяціў на пасяджэнні НАК свой гадзіннік — цяжкі люкс8
Віктар Лукашэнка засвяціў на пасяджэнні НАК свой гадзіннік — цяжкі люкс
«Час, які патрабуе надзвычайнай асцярожнасці». Польскі вундэркінд, які стаў галоўным навукоўцам OpenAI, патлумачыў, чаму менавіта зараз ШІ можа вырвацца з-пад кантролю77
Каментары