Трамп і Сі сустрэліся ў Паўднёвай Карэі і рассталіся моўчкі. Трамп загадаў аднавіць ядзерныя выпрабаванні
Прэзідэнт ЗША Дональд Трамп і старшыня КНР Сі Цзіньпін правялі двухбаковую сустрэчу ў паўднёвакарэйскім горадзе Пусан — першую з пачатку другога тэрміну Трампа.
Сустрэча працягвалася гадзіну 40 хвілін, даўжэй, чым на яе адводзілася часу ў графіку прэзідэнта ЗША. Пасля яе ніякіх заяў ні той, ні другі лідар яшчэ не рабілі, паведамляе Бі-бі-сі.
Трамп ужо пакінуў Паўднёвую Карэю і ляціць назад у Вашынгтон. Сі далей возьме ўдзел у саміце АТЭС.
Трамп і следам за ім Сі прызямліліся ў Пусане менш чым за гадзіну да пачатку сустрэчы.
Вітаючы кітайскага лідара, Трамп перад камерамі сказаў, што чакае вельмі паспяховай сустрэчы. Сі, са свайго боку, заўважыў, што за дзевяць месяцаў прэзідэнцтва Трампа яны тры разы гаварылі па тэлефоне і абменьваліся лістамі.
«Для дзвюх вядучых эканомік свету нармальна час ад часу адчуваць трэнне», — дадаў кітайскі кіраўнік.
Пры гэтым Сі сказаў, што не раз казаў публічна, што ЗША і Кітай «павінны быць сябрамі і партнёрамі». «Гэта тое, чаму нас навучыла гісторыя і чаго патрабуе рэальнасць», — падкрэсліў ён.
Пасля гэтых рэмарак Сі і Трамп пайшлі на перамовы за зачыненымі дзвярыма. З амерыканскага боку на іх прысутнічаюць дзяржсакратар Марка Рубіа, гандлёвы прадстаўнік Джэймісан Грыр, міністр фінансаў Скот Бесент, міністр гандлю Говард Латнік, кіраўнік апарата Сюзі Уайлз і пасол ЗША ў Кітаі Дэвід Перд’ю.
У кітайскую дэлегацыю ўвайшлі міністр замежных спраў Ван І, яго намеснік Ма Чжаасюй, віцэ-прэм'ер Дзяржсавета Хэ Ліфэн, кіраўнік апарата Цай Ці, міністр камерцыі Ван Вэньтаа, старшыня Дзяржаўнага камітэта па развіцці і рэформах Чжэн Шаньцзе.
Галоўных пытанняў на перамовах было тры:
Тарыфы: Трамп выказваў гатоўнасць панізіць пошліны на імпарт з Кітая ў абмен на супрацоўніцтва ў барацьбе з экспартам кампанентаў наркотыку фентанілу.
Рэдказямельныя металы і чыпы для ШІ: такія кампаніі, як Nvidia, хочуць прадаваць у Кітай высокапрадукцыйныя чыпы. Аднак ЗША лічаць гэта пытаннем сваёй нацыянальнай бяспекі, паколькі гэтыя ж чыпы могуць быць звернуты Кітаем на ваенныя мэты. Кітай, са свайго боку, кантралюе большую частку сусветнай вытворчасці рэдказямельных металаў, якія шырока прымяняюцца ў самых розных высокатэхналагічных прадуктах.
TikTok: міністр фінансаў ЗША Скот Бесент на гэтым тыдні казаў, што канчатковае пагадненне аб продажы амерыканскага сегмента сеткі TikTok можа быць дасягнута на саміце Трампа і Сі. Аднак новай інфармацыі аб умовах гэтай здзелкі з таго часу не з’явілася.
Усё гэта адсунула іншыя праблемы ў двухбаковых адносінах, такія як кітайская падтрымка расійскай вайны супраць Украіны, на другі план.
Незадоўга да пачатку сустрэчы Трамп апублікаваў на сваім сайце Truth Social допіс аб «неадкладным» аднаўленні ядзерных выпрабаванняў ЗША, прама згадаўшы Кітай.
«Расія на другім месцы, а Кітай з вялікім адставаннем на трэцім, але на працягу пяці гадоў ён з намі зраўняецца», — напісаў амерыканскі прэзідэнт.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары