У індыйскім штаце Адзіша мясцовыя жыхары выпадкова знайшлі каля шашы пяць дзіцянят арангутанаў. Жывёлы елі бананы і знаходзіліся за тысячы кіламетраў ад свайго натуральнага асяроддзя — астравоў Барнеа і Суматры, паведамляе The Guardian.
Фатаграфіі з дзіцянятамі гэтых малпаў хутка распаўсюдзіліся ў сацыяльных сетках. Мяркуецца, што бананы ім маглі прынесці людзі. Пасля таго як пра знаходку паведамілі лясной службе, спецыялісты аказалі жывёлам першую дапамогу, а затым перавезлі іх у заалагічны парк у адміністрацыйным цэнтры штата. Цяпер арангутаны знаходзяцца там на каранціне пад наглядам спецыялістаў.
Работнік мясцовай лясной службы заявіў, што арангутаны не маглі трапіць у Адзішу натуральным шляхам. Паводле яго слоў, імаверна, дзіцянят прывезлі туды аўтамабільным транспартам. Магчыма, яны знаходзіліся ў чужым для сябе месцы два-тры дні.
Асаблівую занепакоенасць выклікае вельмі малы ўзрост жывёл. Звычайна маці-арангутаны клапоцяцца пра сваіх дзіцянят на працягу першых некалькіх гадоў жыцця і за гэты час вучаць іх навыкам, неабходным для самастойнага выжывання.
Праваахоўнікі пачалі расследаванне, паколькі ўзнікла падазрэнне, што малыя арангутаны маглі стаць ахвярамі незаконнага гандлю. Цяпер спецыялісты спрабуюць высветліць, якім чынам рэдкія малпы трапілі ў Індыю.
Міністр аховы навакольнага асяроддзя штата заявіў, што да перавозкі жывёл можа быць датычная міжнародная злачынная групоўка.
Міжнародны камерцыйны гандаль арангутанамі забаронены. Паводле звестак Сусветнага фонду дзікай прыроды, на Барнеа і Суматры цяпер засталося каля 104 тысяч гэтых малпаў. Прыкладна стагоддзе таму іх колькасць была значна большай — каля 230 тысяч.
Усе тры сучасныя віды арангутанаў знаходзяцца пад пагрозай поўнага знікнення. На працягу многіх гадоў іх колькасць скарачалася праз высечку лясоў, страту натуральнага асяроддзя пражывання і паляванне.
Нягледзячы на ахоўны статус, арангутанаў працягваюць незаконна перавозіць і прадаваць у якасці экзатычных хатніх жывёл або для прыватных калекцый.
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка6
Каментары