Расійскі прадзюсар Макс Фадзееў выпусціў песню пра Беларусь — і праспяваў яе з дачкой бізнэсмена, звязанага з сям'ёй Шэймана
Вядомы расійскі спявак і прадзюсар Макс Фадзееў вырашыў зрабіць цыкл песень, прысвечаных былым савецкім рэспублікам.
Песня Фадзеева мае назву «Беларусь мая». Расіянін выпусціў яе 11 верасня, а ўпершыню праспявае песню ўжывую 26 верасня на ўласным канцэрце ў «Мінск-Арэне».
Фадзееў цяпер стварае цыкл песень, прысвечаных былым савецкім рэспублікам, і «Беларусь мая» — адзін з гэтых твораў. Гэтая рускамоўная песня поўная штампаў пра Беларусь. Глядзіце самі:
«И в глазах-озёрах твоих
Столько силы, столько любви,
Над тобою буслы парят,
Моя дорогая земля […]
Над тобою звёзды горят,
И непокорённый вовек
Посреди Хатыни сейчас
Каменный стоит человек».
Гэтую песню Фадзееў запісаў дуэтам з Марго Зінгман, 11‑гадовай спявачкай з Мінска. Расіянін кажа, што абраў яе, бо Марго зачаравала сваім талентам:
«Вядома, можна было б запрасіць ужо вядомага артыста — гэта быў бы самы просты і відавочны шлях. Але мне заўжды цікавей адкрываць сапраўдны талент і даваць яму магчымасць быць пачутым. А ў Марго я гэты талент пачуў адразу».
Бацька Марго — Аляксандр Зінгман, бізнэсмен, які шмат займаецца праектамі ў Афрыцы. Разам з Сяргеем Шэйманам, сынам Віктара Шэймана, Зінгман некалі быў бенефіцыярам бізнэсу па здабычы золата ў Зімбабвэ. У 2021‑м Зінгман правёў некалькі дзён за кратамі ў Конга — яго арыштавалі па падазрэнні ў пастаўках зброі, але вызвалілі.
Што да Марго, у 2025‑м яна засвяцілася на расійскім шоу «Голас. Дзеці» і айчынным «Фактор.BY. Дзеці» — у апошнім Зінгман дайшла да суперфіналу. Пазней дзяўчынка яшчэ і паўдзельнічала ў расійскай «Дзіцячай Новай Хвалі», дзе ўзяла другую прэмію.
«Наша Нiва» — бастыён беларушчыны
ПАДТРЫМАЦЬЦяпер чытаюць
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка3
Каментары