Мацкевіч: Статкевіч маральна перамог, але мяне проста бесіць вось гэтая «маральная перамога»
Філосаф Уладзімір Мацкевіч у ток-шоу «Жыццё-маліна» падзяліўся сваімі думкамі пра палітычную дзейнасць Міколы Статкевіча. Прызнаючы асабістую мужнасць і незломнасць Статкевіча, Мацкевіч жорстка раскрытыкаваў вынікі яго палітычнай дзейнасці.
«Я вельмі паважаю Міколу як чалавека незломнага, як героя і так далей, але, назіраючы яго вельмі даўно, разумею, што яго наўпроставыя дзеянні ніколі не прыводзілі да станоўчых вынікаў», — адзначыў Уладзімір Мацкевіч.
Мацкевіч нагадаў стварэнне Беларускага згуртавання вайскоўцаў (БЗВ) і адной з дзвюх сацыял-дэмакратычных партый. Аднак, паводле яго слоў, гэтыя праекты не мелі працягу:
«Ад БЗВ нічога не засталося. Партыю ён згубіў, яе некалькі разоў перакуплялі».
Таксама філосаф раскрытыкаваў падыход Статкевіча да масавых акцый, якія палітык узначальваў ці ініцыяваў:
«Таксама яны былі безвыніковымі. І, на жаль, яны сталіся архетыпам для 2020 года, як я гэта называю, «хаджэнне ад плоту і да абеду» без наяўнай мэты і выніку».
Уладзімір Мацкевіч узгадаў асабістую сустрэчу з Міколам Статкевічам адразу пасля яго вызвалення ў 2015 годзе. Тады ён спрабаваў папярэдзіць палітыка аб небяспецы страты набытага маральнага і сацыяльнага капіталу.
«Я яму казаў: «Мікола, зараз вось ты выйшаў, набыўшы вялікую вядомасць, вельмі добрую рэпутацыю, зараз на цябе глядзіць беларускі супраціў, апазіцыя, дэмакратычная супольнасць. Вельмі, вельмі небяспечна зрабіць недарэчныя крокі і згубіць гэта. У цябе ёсць, можа быць, месяц, можа, два, каб узмацніць, павялічыць сваю ўплывовасць і стаць лідарам сапраўдным, а не згубіць гэта», — падзяліўся ўспамінамі Мацкевіч.
Паводле філосафа, Статкевіч не прыслухаўся да парады:
«Ён не паслухаўся. То-бок ён слухаў і пагаджаўся, але ж потым ён пайшоў адразу ад мяне да Някляева на сустрэчу, потым яшчэ да кагосьці. І, як я і вельмі асцерагаўся, зрабіў некалькі недарэчных крокаў і ўвесь здабыты палітычны сацыяльны капітал згубіў».
Мацкевіч заўважыў, што бачыць падобную небяспеку і для Сяргея Ціханоўскага.
«Маральная перамога» — гэта не перамога
У адказ на пытанне пра маральнае лідарства Статкевіча, пра якое сёння шмат гавораць, Мацкевіч пагадзіўся, што ў маральным плане той сапраўды перамог. Аднак саму канцэпцыю «маральнай перамогі» ў палітыцы ён лічыць непрадуктыўнай і нават шкоднай.
«Ну, так яно і ёсць, маральна ён перамог, але ж, ведаеце, мяне, мне проста бесіць вось гэтая «маральная перамога». І калі шмат разоў мы прасіралі выбары, прасіралі вельмі добрыя абставіны для таго, каб узмацніць беларускую апазіцыю, нацыянальную ідэю, дэмакратычны рух і гэтак далей, мы іх прайгрывалі.
А потым тыя, хто прайгрывалі, кажуць: «А затое мы атрымалі маральную перамогу». Ну чаго каштуе маральная перамога, калі няма пазітыўных і прагматычных вынікаў?» — эмацыйна выказаўся філосаф.
Як даводзіць Мацкевіч, «трэба быць прагматыкамі і дасягаць сапраўдных перамог, а не маральных».
«Так, у маральным сэнсе Мікола герой. І тут я ніякіх сумненняў я не маю. Я не згодзен менавіта ў прагматычным сэнсе з такімі дзеяннямі», — падсумаваў філосаф.
Цяпер чытаюць
«У мяне толькі адна мара — вярнуць свайго Дзімку». Маці былога палітвязня Дзмітрыя Гопты расказвае пра новую бяду сына. І просіць замаўляць у яе больш тортаў, каб справіцца4
Каментары
>мяне, мне проста бесіць вось --- мяне проста раз'юшвае
бес = чорт , д'ябал ,нячысцік
---
УСЕ 4 "ЗГУБІЎ" --- гэта СТРАЦІЎ!!