Лявон Вольскі змяніў імідж і паказаў новага члена сям’і — шчанюка-таксу ФОТА
Музыка Лявон Вольскі апублікаваў у сацсетках інтрыгоўны допіс усяго з трох слоў: «Новая старонка жыцця». Самыя ўважлівыя пабачылі на фота шчанюка — новы этап у жыцці артыста сапраўды звязаны са з’яўленнем яшчэ аднаго члена сям’і — таксы.
«Сёння шчанюку спаўняецца тры месяцы. Натуральна, калі мы яго ўзялі, жыццё змянілася — мала спім, рана падымаемся, болей часу праводзім на свежым паветры. А яшчэ — прышчэпкі, паходы да ветэрынара, купля ўсяго неабходнага — розныя турботы, якія забіраюць шмат часу, — распавёў «Нашай Ніве» пра новыя абавязкі Лявон Вольскі. — Але ўсё гэта кампенсуецца станоўчым настроем, які прыносіць у жыццё мілы, вясёлы сабака».
Мянушку таксы артыст пакуль трымае ў сакрэце — магчыма, распавядзе шырокай публіцы, як зробяць усе прышчэпкі. Узялі сабаку ў прафесійных заводчыкаў пад Варшавай. Таксы з жорсткай поўсцю — досыць маладая парода, выведзеная для палявання ў халодны час у месцах, дзе трэба прадзірацца праз гушчар там, дзе звычайная такса магла б параніцца. Цэны на такую пароду пачынаюцца ад 400 даляраў.
На фестывалі беларускай музыкі Graj, дзе Вольскі днямі выступаў з «Крамбамбуляй», гледачы заўважылі і перамены ў іміджы лідара гурта — цяпер яго валасы набылі чырвона-ружовае адценне.
«Наконт колеру — я ўсім кажу, што нарэшце перастаў фарбаваць валасы, вось і адраслі натуральнага колеру. Акурат пасуюць пад чырвоныя крамбамбульныя нагавіцы», — з гумарам расказвае пра новую фрызуру музыка.
Раней ён радаваў прыхільнікаў рознымі вобразамі — спрабуючы сябе і з дрэдамі, і з самымі разнастайнымі стрыжкамі, то выгольваючы скроні, то зноў вяртаючы рокерскія даўгія пасмы.
Каментары
Выведена у мэтах палявання на звяроу якiя мешкаюць у норах: барсукоу, лiсау... янотападобных 🐕 сабакау. Вось для чаго ёй i патрэбна такая грубая поусць- каб скура зямлёю не забiвалася!