Дзяржсакратар Рады бяспекі нагадаў, што «ў мэтах зняцця напружання ўсе раёны правядзення вучэнняў перанесены ў глыб тэрыторыі краіны».
Мэты вучэнняў «Захад-2025» выключна абарончыя. Пра гэта журналістам заявіў дзяржаўны сакратар Рады бяспекі Аляксандр Вальфовіч падчас наведвання шэрагу прадпрыемстваў Аршанскага раёна, піша БелТА.
«Ужо столькі сказана кіраўніком нашай дзяржавы, кіраўніцтвам Міністэрства абароны аб тым, што гэтыя вучэнні («Захад-2025») планавыя, такія вучэнні праходзяць раз на два гады. Мэты вучэнняў зусім не наступальныя. На тэрыторыі нашых суседніх дзяржаў праводзяцца вучэнні выключна з наступальнымі мэтамі. Для нашых вучэнняў пастаўлена выключна абарончая мэта — абарона Саюзнай дзяржавы», — сказаў Аляксандр Вальфовіч.
Ён таксама дадаў, што ў мэтах зняцця напружання ўсе раёны правядзення вучэнняў перанесены ў глыб тэрыторыі краіны, хоць першапачаткова планавалася задзейнічаць практычна ўсе палігоны ў Брэсцкай і Гродзенскай абласцях.
«А нашы суседзі, у адказ на нашу добразычлівую рыторыку, разгарнулі групоўку войскаў для правядзення вучэнняў на палігонах паблізу нашай мяжы. Так, сёння больш за 1 тыс.чалавек знаходзіцца на палігоне Падброддзі, за 15 км ад нашай мяжы. Як нам на гэта рэагаваць? Перадыслакаваная дадатковая частка авіяцыі на аэрадромы Польшчы і краін Прыбалтыкі, дзе знаходзіцца звыш 148 самалётаў. Праводзяцца і іншыя мерапрыемствы, якія нас павінны насцярожыць і, напэўна, штурхнуць на меры ў адказ, справакаваць хочуць. Але мы разумныя людзі, мы нікога правакаваць не будзем, адсочваем і гатовыя даць істотны адпор нядобразычліўцам, калі яны раптам асмеляцца паквапіцца на нашу тэрыторыю. Сваю зямлю мы нікому не аддамо, мы яе будзем абараняць да апошняга ўздыху, як абаранялі яе нашы продкі», — падкрэсліў дзяржаўны сакратар.
Ён таксама звярнуў увагу на планавы характар і вучэнняў АДКБ, якія ў тым ліку пройдуць і на тэрыторыі Рэспублікі Беларусь
«Практычна ўсе кантынгенты краін АДКБ прыбылі на палігон Ласвіда, які таксама знаходзіцца ў глыбіні нашай краіны. Гэта таксама планавыя вучэнні, якія праходзяць па чарзе на тэрыторыі краін АДКБ. Самыя буйныя вучэнні на тэрыторыі Беларусі — «Узаемадзеянне-2025».
На іх будуць задзейнічаны Калектыўныя сілы аператыўнага рэагавання (КСАР). Трэба будзе адпрацоўка пытанняў, звязаных з лакалізацыяй канфлікту на тэрыторыі адной з дзяржаў», — адзначыў Аляксандр Вальфовіч.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам25
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2424
Каментары