Барысаўцы скардзяцца, што ім забаранілі прадаваць дамы — іх збіраюцца зносіць і будаваць шматпавярховікі
Жыхары барысаўскай вуліцы Рабочы Хімік кажуць, што ўчасткі ўжо абмералі і сказалі, што прыватны сектар пойдзе пад знос. Але ў чыноўнікаў іншая версія.
На вуліцы Рабочы Хімік захаваўся невялікі прыватны сектар з некалькіх двароў. Апошнія тыдні мясцовыя актыўна абмяркоўваюць чуткі: дамы хутка будуць зносіць, а на іх месцы пабудуюць шматпавярховікі.
Пад гэтую справу ўладальнікам дамоў нават забаранілі іх прадаваць.
«У нас тут усяго пяць-шэсць двароў. Я ўжо думала прадаць дом — ён бацькоўскі. Мама тут жыла, я за ёй даглядала. Пасля яе смерці ўступіла ў спадчыну.
А цяпер, калі вырашыла прадаць, прыйшлі спецыялісты (хто менавіта, не запомніла), замералі ўчастак і сказалі, што дамы будуць зносіць. Я пажылы чалавек, мне б ведаць, што будзе далей. А ніхто нічога не тлумачыць», — расказала мясцовая жыхарка «Мінскай праўдзе».
Яе суседка кажа, што спрабавала арганізаваць зварот да ўладаў.
«Мы пайшлі да ўсіх суседзяў, пыталіся, што рабіць. Хтосьці кажа — трэба пісаць у выканкам, а хтосьці ўвогуле раіць здымаць відэа і выкладваць у TikTok. Але мы ж не блогеры, у нас унукаў няма, самі не ўмеем», — паскардзілася жанчына.
У Барысаўскім райвыканкаме заяўляюць, што прадаваць дамы нікому не забаранялі. Але прызналі, што прыватны сектар плануюць знесці.
«У гэтым мікрараёне сапраўды распрацаваная горадабудаўнічая дакументацыя. Яна прадугледжвае будаўніцтва шматкватэрнага жылля і аб'ектаў грамадскага прызначэння. Але тэрміны рэалізацыі пакуль не вызначаныя. І самае галоўнае — ніякіх забаронаў на продаж дамоў на вуліцы Рабочы Хімік няма і быць не можа», — заявіла начальніца аддзела архітэктуры і будаўніцтва Наталля Пушнова.
Цяпер чытаюць
Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?11
Каментары
Увогуле цяжка верыць версіі ад прапагандысцкага СМІ, якое пераказвае словы чыноўніка. Могуць перадаць не ўсё або не так.
Даслоўны пераказ гэтых версій беларускімі апазіцыйнымі СМІ таксама стварае цяжкае ўражанне. Прапаганда і дзяржаўная хлусня не толькі ў палітычных справах, а і вось у такіх - маёмасных, горадабудаўнічых.