«Лічу, што гэта мая місія». Беларускамоўны Павел з ДЦП выклікаў хвалю захаплення, зайздрасці і любові
Павел і ягоная дзяўчына выпадкова трапілі ў вулічную апытанку мінскага блогера. «Якія прыгожыя, светлыя чалавечкі. Шчасця абаім!» — тысячы людзей адрэагавалі.
Мінскі блогер Дзмітрый Жых (Belrels) вядомы сваімі вулічнымі інтэрв'ю з выпадковымі мінакамі. Ён распытвае месцічаў пра тое, як яны жывуць і пра што мараць, пры гэтым часта героямі яго апытанак становяцца людзі з інваліднасцю.
Нядаўна ў яго канале з’явілася відэа, якое ён суправадзіў подпісам: «Энергія, якая сцірае межы!».
Блогер патлумачыў, што выпадкова сустрэў на вуліцы неймаверную пару. У хлопца, якога завуць Павел, — ДЦП. Аднак, па словах аўтара відэа, «за драйвам і шчырасцю юнака гэтага проста не заўважаеш».
«Ён — філолаг, які закаханы ў беларускую мову, і яго свет зараджае ўсё навокал», — піша Дзмітрый.
На пытанне, ці не перашкаджае жыць Паўлу яго захворванне, той шчыра прызнаўся, што часам «бывае цяжка кудысьці падняцца».
«А так збольшага ўсё добра. Люблю чытаць кнігі, люблю футбол — ну, гляджу ў асноўным», — працягнуў хлопец.
Павел расказаў, што ў будучыні хацеў бы рэалізаваць сябе ў прафесіі:
«Мне цікава займацца навукай. Лічу, што ў Беларусі павінна больш развівацца беларуская мова. У нас шмат выбітных людзей, якія праславілі нашу краіну на ўвесь свет. У краіне гэтаму надаецца мала ўвагі, таму я і абраў для сябе такі шлях. Лічу, што гэта мая місія».
У кароткай размове Павел таксама заўважыў, што хацеў бы, каб «людзі не былі такімі злобнымі і ва ўсіх усё было добра», і параіў: «Трэба ўсміхацца, тады ўсё будзе добра».
Адказваючы на пытанне пра мару, хлопец прызнаўся:
«Мара — гэта, напэўна, каб беларуская мова квітнела. Такіх матэрыяльных рэчаў у мяне няма. Я хачу проста, каб ва ўсіх усё было добра і ўсе былі шчаслівыя».
Калі ж блогер задаў больш канкрэтнае пытанне — чым Паўла можна парадаваць — той адказаў, што даўно марыць набыць раман Уладзіміра Караткевіча «Каласы пад сярпом тваім». Але кніга каштуе дорага.
«А што б вы хацелі пажадаць людзям?» — спытаў напрыканцы Дзмітрый.
«Больш усміхацца, глядзець у будучыню толькі з добрымі намерамі і ніколі не заганяцца праз нейкую лухту. У жыцці ўсё можна вырашыць, якая б ні была сітуацыя і што б ні здарылася. Заўсёды трэба ісці да сваёй мэты, сур’ёзна ставіцца да жыцця. За цябе нічога не зробяць — трэба несці адказнасць за самога сябе, і тады ўсё будзе. Ніколі не здавацца — гэта галоўнае!»
Дзяўчына Паўла ў сваю чаргу расказала, што хлопец захапіў яе сваёй дабрынёй, шчырасцю, павагай да людзей і гатоўнасцю прыйсці на дапамогу ў цяжкі час.
Відэа ўжо набрала звыш 150 тысяч праглядаў. «Захапленне! Які шчыры, якая прыгожая мова! Яшчэ і любіць Караткевіча! А якая дзяўчына!»; «Якія прыгожыя, светлыя чалавечкі. Шчасця абаім!» — пішуць гледачы ў каментарах.
Каментары
Годныя людзі, няхай у іх усё будзе добра. Шкада, што няма магчымасці падараваць ім з маёй бібліятэкі, што збіралася з любоўю. Эх..