У ЗША аўтарку дзіцячай кнігі пра пераадоленне гора прысудзілі да пажыццёвага тэрміну за забойства мужа

Суд прысудзіў Кіры Рычынс, аўтарку дзіцячай кнігі аб пераадоленні гора са штата Юта, да пажыццёвага тэрміну без права на ўмоўна-датэрміновае вызваленне за забойства мужа — бацькі яе дзяцей. У судзе былі зачытаны заявы яе сыноў, якія кажуць, што баяцца сваёй маці. Рычынс настойвае на сваёй невінаватасці і плануе аспрэчваць рашэнне суда, піша Бі-бі-сі.

Абвяшчаючы прысуд, суддзя Рычард Мразік сказаў, што Рычынс «занадта небяспечная, каб калі-небудзь быць на волі». Вынясенне прысуду прыйшлося на дзень нараджэння яе мужа Эрыка — у сераду 13 мая яму споўнілася б 44 гады.

Што казалі ў судзе члены сям'і

У судзе выступіў свёкар жанчыны Юджын Рычынс. Ён прасіў суддзю прысудзіць яе да пажыццёвага тэрміну, каб абараніць яе дзяцей, перадае Associated Press. «Гэты прысуд вельмі важны, каб тром сынам Эрыка ніколі не даводзілася жыць у страху, што чалавек, адказны за смерць іх бацькі, можа нашкодзіць і ім», — сказаў ён.

Дзецям Рычынсаў на момант гібелі Эрыка было 9, 7 і 5 гадоў. Зараз яны — пад апекай яго сястры Кэці Рычынс-Бэнсан. Яна заявіла, што хлопчыкі — «не дэкарацыі для нейкай дзіцячай кнігі пра гора і страту, але менавіта да гэтай ролі Куры звяла іх жыццё».

Сацыяльныя работнікі зачыталі ў судзе лісты сыноў Рычынс. «Ты забрала ў мяне тату выключна з прагнасці, і табе было напляваць на ўсіх, акрамя самой сябе і тваіх дурных бойфрэндаў», — напісаў яе сярэдні сын (зараз яму 11 гадоў). Хлопчык вымушаны быў клапаціцца аб сваім малодшым браце, бо мама не займалася імі.

Старэйшы сын (зараз яму 13 гадоў) таксама расказаў, што яму даводзілася клапаціцца аб братах. Па яго словах, маці часцяком замыкала яго ў пакоі, калі піла алкаголь.

Рычынс, якая адмовілася даваць паказанні падчас судовага разбору, перад вынясеннем прысуду выступіла з 30‑хвіліннай заявай, звернутай да сваіх сыноў.

«Як бы моцна вас не прымушалі думаць, што ваш тата быў забіты, што я забрала яго ў вас, гэта зусім не так. Поўная хлусня», — прыводзіць CNN словы Рычынс.

«Я ведаю, што сёння вы не хочаце размаўляць са мной і ненавідзіце мяне. Гэта нармальна. Калі вы будзеце гатовыя, я буду побач», — сказала яна.

Абарона прасіла прысудзіць Рычынс да больш мяккага тэрміну, аргументуючы гэта тым, што ў будучыні яе дзеці могуць захацець адносін са сваёй маці. Блізкія Куры Рычынс таксама прасілі аб менш суровым пакаранні: некаторыя з іх, напрыклад яе брат Роні Дардэн, настойвалі на яе невінаватасці.

Адвакаты Рычынс маюць намер абскардзіць прысуд.

Па версіі следства, 36‑гадовая агент па нерухомасці Куры Рычынс мела даўгі на мільёны даляраў і планавала жыццё з іншым мужчынам. Яна заключыла некалькі дагавораў аб страхаванні жыцця свайго мужа (ён сам пра гэта не ведаў) і памылкова лічыла, што атрымае больш за $4 млн у спадчыну пасля яго смерці.

Эрык Рычынс памёр 4 сакавіка 2022 года, выпіўшы прыгатаваны жонкай кактэйль. Прычынай смерці аказалася перадазіроўка фентанілам. Праз год Куры Рычынс выпусціла дзіцячую кнігу «Ты са мной?» аб хлопчыку, чый бацька памёр, а 8 мая 2023 года паліцыя затрымала яе па падазрэнні ў забойстве мужа.

Рычынс адмовілася даваць паказанні ў судзе, а яе абарона не стала зваць сведак. Адвакаты жанчыны казалі, што яны перакананыя ў тым, што абвінавачанне не падало дастаткова доказаў. Абарона Рычынс настойвала, што яе муж быў залежны ад абязбольвальных, але калі Эрык памёр, яна сказала паліцыянтам, што ён не заўважаны ва ўжыванні наркотыкаў.

У сакавіку 2026 суд прысяжных прызнаў Куры Рычынс вінаватай па ўсіх пунктах: забойства, замах на забойства (яна спрабавала атруціць свайго мужа 14 лютага 2022 года, але ён выжыў) і махлярства. Яе чакае асобны суд па іншых фінансавых абвінавачваннях.

• 0
• 0
• 0
• 2
• 6
• 2
• 0
• 0