Усе грошы экс-палітзняволенай Наталлі Дулінай сабралі за лічаныя гадзіны
Экс-дацэнтка кафедры італьянскай мовы Мінскага дзяржаўнага лінгвістычнага ўніверсітэта, былая палітзняволеная Наталля Дуліна ўчора звярнулася па дапамогу, збор у яе падтрымку быў аб'яўлены на платформе «Байсол».
Наталлю Дуліну ў 2020 годзе, пасля ўдзелу ў агульнанацыянальным страйку, звольнілі з працы ў МДЛУ. З тых часоў яна пяць разоў падвяргалася адміністрацыйным арыштам па 14 або 15 сутак за палітычную актыўнасць.
3 кастрычніка 2022 года яе затрымалі па крымінальных артыкулах па абвінавачаннях у актыўным удзеле ў масавых мерапрыемствах на тэрыторыі МДЛУ і «садзейнічанні экстрэмісцкай дзейнасці», чым назвалі інтэрв'ю незалежнаму СМІ. Жанчыне прысудзілі 3,5 гадоў пазбаўлення волі.
Пакаранне яна адбывала ў жаночай калоніі №4 у Гомелі. Калі да заканчэння тэрміну заставалася 6 месяцаў, Дуліну падчас візіту ў Мінск прадстаўніка прэзідэнта ЗША Кіта Келага разам з групай іншых палітвязняў вывезлі ў Літву. Так яна апынулася ў вымушанай эміграцыі, хоць сама мела намер адбыць тэрмін да канца і пасля таго застацца жыць дома.
Цяпер Наталлі Дулінай неабходна неяк стаць на ногі і забяспечыць сябе, працягваць жыць на новым месцы, знайсці працу.
«У Беларусь я вярнуцца не магу, гэта небяспечна і можа скончыцца чарговым арыштам. Мне маральна вельмі цяжка, таму што мяне пазбавілі дому, пазбавілі якога-небудзь статусу. Я вызваленая, але ў мяне няма дакументаў, якія даказваюць гэта. Я грамадзянка Беларусі, але не магу там жыць. Я пенсіянерка, але праз адсутнасць дакументаў не магу атрымліваць сваю пенсію. Фактычна я адрэзаная ад свайго ранейшага жыцця, а каб пачаць новае, неабходная дапамога», — піша Дуліна.
Яна просіць беларусаў сабраць ёй €5000. Гэта дасць магчымасць на працягу хаця б некалькіх першых месяцаў знайсці жыллё і вырашыць праблемы са здароўем, паколькі жанчына мае патрэбу ў пратэзаванні зубоў.
Неабходныя пяць тысяч еўра сабралі за лічаныя гадзіны. Па стане на 07:00 раніцы сабрана 5681 еўра.
Падтрымаць Наталлю Дуліну можна па спасылцы.
Каментары