Не самы смачны напой, але вельмі эфектыўны супраць мышачных сутарг.
Усё часцей падчас спаборніцтваў мы бачым, як спартоўцы п’юць сок з квашаных агуркоў — расол. Гэта не модны капрыз, а частка прафесійнай стратэгіі барацьбы з сутаргамі. Так, падчас фіналу French Open 2024 Карлас Алькарас і Янік Сінер ужывалі менавіта гэты напой, а зборная Англіі па футболе выкарыстоўвае яго на чэмпіянаце Еўропы, піша польская служба BBC.
Як гэта працуе?
Расол змяшчае вялікую колькасць электралітаў — натрый і калій, што спрыяе хуткаму зняццю сутаргаў. Даследаванні паказалі, што ён можа спыніць сутаргі на 40% хутчэй, чым вада. Аднак дзейнічае ён не столькі дзякуючы засваенню соляў, колькі праз актывацыю рэфлексу ў роце, які перапыняе сігналы сутаргі, што ідуць у мозг.
Эфект амаль імгненны — не трэба чакаць, пакуль арганізм пераварыць і засвоіць электраліты.
Як ужываць правільна?
Прафесар Маюр Ранчордас з Sheffield Hallam University падкрэслівае:
расол не трэба піць, яго трэба толькі прапаласкаць у роце 20—30 секунд, а потым выплюнуць. Тады і спрацоўваюць воцат і соль. Калі пасля гэтага спартовец п’е ваду, каб «змыць» непрыемны смак, эфект знікае.
Ён нават раіць дадаваць у слоік з агуркамі чырвоны перац — чым больш «агідны» смак, тым мацнейшы вынік.
Ці лепш за ізатонікі?
Звычайныя спартыўныя напоі працуюць павольней, бо арганізм павінен засвоіць пажыўныя рэчывы. А расол уплывае праз нервовую сістэму і дае імгненны вынік. Але не ўсім ён падыходзіць. Некаторыя спартоўцы могуць сутыкнуцца з праблемамі стрававання і нават ванітаваць.
А ці можна проста з’есці агуркі?
Не. Расол — гэта канцэнтраваная вадкасць, якая дае хуткі вынік.
Такім чынам, расол з квашаных агуркоў — недарагая, даступная і дзейсная «зброя» супраць сутаргаў. Але ён патрабуе правільнага ўжывання. Як і любую спартыўную стратэгію, яго трэба выпрабаваць загадзя — на трэніроўцы, а не падчас адказнага матча.
Цяпер чытаюць
«Заходзіш у камеру, а яны кажуць: «Мы з табой адмаўляемся сядзець». Ціханоўскі расказаў, як сутыкнуўся з праблемай нізкага статусу12
Каментары
ну нічога, хутка і за гурэчны расол будуць медалі адымаць.