Nie samy smačny napoj, ale vielmi efiektyŭny suprać myšačnych sutarh.
Usio čaściej padčas spabornictvaŭ my bačym, jak spartoŭcy pjuć sok z kvašanych ahurkoŭ — rasoł. Heta nie modny kapryz, a častka prafiesijnaj stratehii baraćby z sutarhami. Tak, padčas finału French Open 2024 Karłas Alkaras i Janik Sinier užyvali mienavita hety napoj, a zbornaja Anhlii pa futbole vykarystoŭvaje jaho na čempijanacie Jeŭropy, piša polskaja słužba BBC.
Jak heta pracuje?
Rasoł źmiaščaje vialikuju kolkaść elektralitaŭ — natryj i kalij, što spryjaje chutkamu źniaćciu sutarhaŭ. Daśledavańni pakazali, što jon moža spynić sutarhi na 40% chutčej, čym vada. Adnak dziejničaje jon nie stolki dziakujučy zasvajeńniu solaŭ, kolki praz aktyvacyju refleksu ŭ rocie, jaki pierapyniaje sihnały sutarhi, što iduć u mozh.
Efiekt amal imhnienny — nie treba čakać, pakul arhanizm pieravaryć i zasvoić elektrality.
Jak užyvać pravilna?
Prafiesar Majur Rančordas z Sheffield Hallam University padkreślivaje:
rasoł nie treba pić, jaho treba tolki prapałaskać u rocie 20—30 siekund, a potym vyplunuć. Tady i spracoŭvajuć vocat i sol. Kali paśla hetaha spartoviec pje vadu, kab «zmyć» niepryjemny smak, efiekt źnikaje.
Jon navat raić dadavać u słoik z ahurkami čyrvony pierac — čym bolš «ahidny» smak, tym macniejšy vynik.
Ci lepš za izatoniki?
Zvyčajnyja spartyŭnyja napoi pracujuć pavolniej, bo arhanizm pavinien zasvoić pažyŭnyja rečyvy. A rasoł upłyvaje praź niervovuju sistemu i daje imhnienny vynik. Ale nie ŭsim jon padychodzić. Niekatoryja spartoŭcy mohuć sutyknucca z prablemami stravavańnia i navat vanitavać.
A ci možna prosta źjeści ahurki?
Nie. Rasoł — heta kancentravanaja vadkaść, jakaja daje chutki vynik.
Takim čynam, rasoł z kvašanych ahurkoŭ — niedarahaja, dastupnaja i dziejsnaja «zbroja» suprać sutarhaŭ. Ale jon patrabuje pravilnaha ŭžyvańnia. Jak i lubuju spartyŭnuju stratehiju, jaho treba vyprabavać zahadzia — na treniroŭcy, a nie padčas adkaznaha matča.
Ciapier čytajuć
Čamu ŭ biełaruskaj turmie tak mocna chudziejuć? Tłumačym11
Kamientary
nu ničoha, chutka i za hurečny rasoł buduć miedali adymać.