Сабаленка спыніла матч супраць украінкі, хаця суддзя сказала гуляць далей
Арына Сабаленка не без цяжкасцяў абыграла ўкраінку Марту Касцюк (WTA 36) у чвэрцьфінале турніра ў Мадрыдзе — беларуска перамагала пасля двух тай-брэйкаў 7:6, 7:6. Але матч запомніцца не толькі ўпартай барацьбой, але і скандальнай сітуацыяй, піша «Трыбуна».
Падчас тай-брэйка ў другім сэце, пры ліку 5:4 на карысць Касцюк, прыйшла чарга Сабаленкі падаваць. Тая дапусціла памылку пры першай падачы, а затым падышла да суддзі з просьбай закрыць дах — падчас матча пачаўся дождж. Але рэферы з Кітаю Хуан Чжан адмовіла, аргументаваўшы тым, што «ўсё не настолькі дрэнна». Тады Сабаленка вярнулася на корт, нібыта збіралася зрабіць другую спробу, але перадумала, пасля чаго пайшла ў месца адпачынку і захуталася ў ручнік — па факце, адмовілася гуляць далей. Але ніякіх санкцый на свой адрас не атрымала — замест гэтага суддзя, як і хацела Сабаленка, прыпыніла матч. Касцюк абуралася, але гэта не дало ніякага плёну.
Пасля паўзы Сабаленцы далі дзве спробы падаць, але ёй гэта не дапамагло: яна саступіла ў розыгрышу — лік стаў 4:6. Касцюк атрымала шанц забраць сэт, але беларуска здолела перавярнуць падзеі і ў выніку выйграла другі тай-брэйк з лікам 9:7.
Пасля сустрэчы Касцюк традыцыйна адмовілася ціснуць руку Сабаленка, а яшчэ падышла да сваёй каманды і сказала: «Пайшло ўсё да д'ябла! Яна ніколі не выйграе прыз за спартыўныя паводзіны. Гэта дакладна!».
Наконт эпізоду з прыпыненнем гульні Сабаленка пасля сказала: «Падаваць пад дажджом было немагчыма. Я паспрабавала выканаць першую падачу, але зразумела, што павінна спыніцца, бо вада трапляла ў вочы. Гэта было немагчыма. Я ведала, што зараз зраблю падвойную памылку, і не хацела гэтага дапусціць, таму вырашыла, што гульню трэба спыніць».
Для Касцюк гэта паражэнне стала асабліва крыўдным. Пасля пачатку вайны ў сябе на Радзіме ўкраінка паслядоўна выступае за адхіленне ад міжнародных спаборніцтваў тэнісістаў з беларускімі і расійскімі пашпартамі. Як вядома, тэнісныя міжнародныя арганізацыі такія заклікі ігнаруюць, таму ўкраінцы выказваюць сваю нязгоду тым, што не ціснуць расіянам і беларусам рукі пасля матчаў. У студзені Касцюк прызнавалася, што не хоча паціскаць рукі тэнісістаў з РФ і Беларусі да канца кар'еры.
Цяпер чытаюць
Памятаеце Пятрушу, які выдзіраў драты «дыджэям Перамен»? Яго перавялі ў трэцюю лігу чыноўнікаў пасля месяцаў беспрацоўя7
Памятаеце Пятрушу, які выдзіраў драты «дыджэям Перамен»? Яго перавялі ў трэцюю лігу чыноўнікаў пасля месяцаў беспрацоўя
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек44
Каментары
Малайца Сабаленка Калі абражают на публіке Адкажы але прыстойна)))