Sabalenka spyniła matč suprać ukrainki, chacia sudździa skazała hulać dalej
Aryna Sabalenka nie bieź ciažkaściaŭ abyhrała ŭkrainku Martu Kaściuk (WTA 36) u čverćfinale turnira ŭ Madrydzie — biełaruska pieramahała paśla dvuch taj-brejkaŭ 7:6, 7:6. Ale matč zapomnicca nie tolki ŭpartaj baraćboj, ale i skandalnaj situacyjaj, piša «Trybuna».
Padčas taj-brejka ŭ druhim secie, pry liku 5:4 na karyść Kaściuk, pryjšła čarha Sabalenki padavać. Taja dapuściła pamyłku pry pieršaj padačy, a zatym padyšła da sudździ z prośbaj zakryć dach — padčas matča pačaŭsia doždž. Ale refiery z Kitaju Chuan Čžan admoviła, arhumientavaŭšy tym, što «ŭsio nie nastolki drenna». Tady Sabalenka viarnułasia na kort, nibyta źbirałasia zrabić druhuju sprobu, ale pieradumała, paśla čaho pajšła ŭ miesca adpačynku i zachutałasia ŭ ručnik — pa fakcie, admoviłasia hulać dalej. Ale nijakich sankcyj na svoj adras nie atrymała — zamiest hetaha sudździa, jak i chacieła Sabalenka, prypyniła matč. Kaściuk aburałasia, ale heta nie dało nijakaha plonu.
Paśla paŭzy Sabalency dali dźvie sproby padać, ale joj heta nie dapamahło: jana sastupiła ŭ rozyhryšu — lik staŭ 4:6. Kaściuk atrymała šanc zabrać set, ale biełaruska zdoleła pieraviarnuć padziei i ŭ vyniku vyjhrała druhi taj-brejk ź likam 9:7.
Paśla sustrečy Kaściuk tradycyjna admoviłasia cisnuć ruku Sabalenka, a jašče padyšła da svajoj kamandy i skazała: «Pajšło ŭsio da djabła! Jana nikoli nie vyjhraje pryz za spartyŭnyja pavodziny. Heta dakładna!».
Nakont epizodu z prypynieńniem hulni Sabalenka paśla skazała: «Padavać pad daždžom było niemahčyma. Ja pasprabavała vykanać pieršuju padaču, ale zrazumieła, što pavinna spynicca, bo vada traplała ŭ vočy. Heta było niemahčyma. Ja viedała, što zaraz zrablu padvojnuju pamyłku, i nie chacieła hetaha dapuścić, tamu vyrašyła, što hulniu treba spynić».
Dla Kaściuk heta paražeńnie stała asabliva kryŭdnym. Paśla pačatku vajny ŭ siabie na Radzimie ŭkrainka paśladoŭna vystupaje za adchileńnie ad mižnarodnych spabornictvaŭ tenisistaŭ ź biełaruskimi i rasijskimi pašpartami. Jak viadoma, tenisnyja mižnarodnyja arhanizacyi takija zakliki ihnarujuć, tamu ŭkraincy vykazvajuć svaju niazhodu tym, što nie cisnuć rasijanam i biełarusam ruki paśla matčaŭ. U studzieni Kaściuk pryznavałasia, što nie choča paciskać ruki tenisistaŭ z RF i Biełarusi da kanca karjery.
Ciapier čytajuć
Chto toj redaktar biełaruskaj Vikipiedyi, jakoha pasadzili na dva hady za «dyskredytacyju Biełarusi»11
Kamientary
Małajca Sabalenka Kali abražajut na publikie Adkažy ale prystojna)))