«Еўропа гатовая адказаць». Урсула фон дэр Ляен пракаментавала абвешчаную Трампам гандлёвую вайну
Прэзідэнт Еўракамісіі Урсула фон дэр Ляен выступіла з заявай пра увядзенне Трампам новых пошлін, у тым ліку ў 20% — на імпарт з ЕС. Паводле яе слоў, Еўропе ёсць чым адказаць, але яна прапануе Трампу перамовы.
ЕС прапануе Трампу перамовы аб адмене гандлёвых бар'ераў, але ўвядзе меры ў адказ, калі дыялог не дасць выніку, заявіла фон дэр Ляен.
«Універсальныя тарыфы, абвешчаныя ЗША, — гэта сур'ёзны ўдар па бізнэсе і спажыўцам ва ўсім свеце. Еўропа гатовая прыняць меры ў адказ. Мы заўсёды будзем абараняць нашы інтарэсы і каштоўнасці. Але мы таксама гатовыя да ўзаемадзеяння. І перайсці ад канфрантацыі да перамоў», — сказала фон дэр Ляен.
Яна падкрэсліла, што рашэнне амерыканскай адміністрацыі паставіць найбольш эканамічна ўразлівыя краіны і іх насельніцтва ў вельмі цяжкае становішча.
Фон дэр Ляен адзначыла, што спажыўцы ва ўсім свеце адразу адчуюць уплыў гандлёвай вайны, паколькі цэны нават на базавыя тавары і паслугі адчувальна ўзрастуць.
Паводле яе слоў, Еўракамісія ўжо заканчвае распрацоўку першага пакета контрзахадаў у адказ на пошліны на сталь і рыхтуецца да дадатковых у выпадку, калі не атрымаецца вырашыць сітуацыю дыпламатычным шляхам.
«Наступствы будуць жудаснымі для мільёнаў людзей па ўсім свеце», — сказала кіраўніца Еўракамісіі.
Яна дадала, што ЕС «гатовы адказваць» і рыхтуе адмысловыя крокі. «Я ведаю, што многія з вас адчуваюць сябе падманутымі нашым найдаўнейшым саюзнікам», — сказала яна.
2 красавіка Трамп абвясціў «Днём вызвалення» Амерыкі і паведаміў, што ўводзіць нечуваныя з пачатку мінулага стагоддзя татальныя тарыфы на імпарт тавараў у ЗША.
Цяпер чытаюць
Колькасць судоў па палітычных крыміналках зменшылася ў разы19
Каментары