Абавязковае размеркаванне для студэнтаў-платнікаў пакуль не ўводзяць
Не першы год ідуць размовы пра тое, што ў Беларусі адпрацоўваць па размеркаванні будуць абавязваць і тых выпускнікоў ВНУ, якія вучыліся платна. Аднак у Міністэрстве адукацыі заявілі, што па стане на сённяшні дзень увядзенне абавязковай адпрацоўкі для платнікаў не прадугледжана.
Пры жаданні такія студэнты, маўляў, і так могуць атрымаць накіраванне на першае месца працы — і штогод такой магчымасцю карыстаюцца больш за тысячу чалавек, як адзначыў начальнік Галоўнага ўпраўлення прафесійнай адукацыі Сяргей Пішчоў.
На думку чыноўніка, размеркаванне на першае месца працы — гэта, маўляў, добрая сацыяльная гарантыя для маладых спецыялістаў. Бо ў навучальных установах яны асвойваюць прафесію ў роўных умовах і ў аднолькавым аб'ёме, а накіраванне на працу па размеркаванні трэба разглядаць як працяг навучання, але ўжо на практыцы і пад кіраўніцтвам вопытных калег.
Акрамя таго, Пішчоў паведаміў, што ў беларускіх ВНУ цяпер праходзяць навучанне каля 2 тыс. грамадзян Расіі. Усяго ж, паводле яго слоў, у ВНУ Беларусі вучацца каля 30 тыс. іншаземцаў.
Каментары