«Камусьці будуюць фантаны, а ў нас няма дарог!» Абураныя жыхары Фаніпаля звярнуліся да Турчына
Больш за 10 гадоў таму Юлія Барысаўна і Аляксандр Барысавіч купілі ўчастак пад будаўніцтва дома ў мікрараёне Паўднёвы-2 Фаніпаля. Тады там не было ні дарог, ні транспартных зносін. Муж і жонка вырашылі, што гэта часовыя нязручнасці. Аднак і сёння ў Паўднёвым-2 бездараж. А ў школу, якая знаходзіцца за 2 км ад дома, дзеці вымушаны хадзіць пешшу: дабрацца да ўстановы адукацыі няма чым. Пра гэта жанчына расказала старшыні Мінаблвыканкама Аляксандру Турчыну падчас прыёму грамадзян, піша «Мінская праўда».
Па словах Юліі Барысаўны, аналагічная карціна ў суседнім мікрараёне Паўднёвы-1, які быў пабудаваны яшчэ раней.
— Нашаму мікрараёну 17 гадоў, за гэты час там не добраўпарадкавалі ні адну дарогу. Паўднёваму-1 пашанцавала крыху больш: там «апранулі» ў асфальт дарогу на вуліцы Перамогі. Атрымліваецца, у 17 год прыводзяць у парадак па адной дарозе? — задала рытарычнае пытанне жанчына.
Каб ацаніць, наколькі ў Паўднёвым-2 усё дрэнна з дарогамі, журналісты за дзень да прыёму грамадзян выехалі ў Фаніпаль, сустрэліся з Юліяй Барысаўнай. Яна паказала важкую тэчку з лістамі з розных інстанцый. Тут дзясяткі адказаў, чаму ў Паўднёвым-2 не добраўпарадкоўваюць дарогі і не жадаюць пускаць транспарт.
— Мы доўгі час чакалі гэты ўчастак, марылі абзавесціся з мужам уласным жыллём. 10 гадоў будавалі хату сваімі рукамі: я сама клала плітку, рабіла сцяжку, тынкавала сцены. Выручыла прафесія: я – інжынер-будаўнік. Нарэшце, 4 гады таму адзначылі наваселле. Але радасць была не доўгая: адна справа будаваць дом і не жыць там, і зусім іншая — пачаць абжывацца, прывыкаць да раёна.
Больш за ўсё пытанняў, запэўнівае жыхарка Фаніпаля, выклікалі дарогі — дакладней, іх стан.
— Дзе сканчаецца праезная частка і пачынаецца тратуар — не ясна. У выніку аднойчы машына збіла жанчыну, прычым яна ж і аказалася вінаватай, бо выйшла на дарогу. Іншы раз дачка прыйшла са школы і паскардзілася: калі ішла на заняткі, ножка засела ў брудзе, красовак літаральна «засмактала». Дзіця не разгубілася, выцягнула так-сяк абутак, каб потым у школе адмыць яго. Але хіба гэта нармальна?
У 2017 годзе, паводле слоў Юліі Барысаўны, дарогі ў Паўднёвым-2 аднойчы падсыпалі. Але ўжо праз год яны вярнуліся да «завадскіх налад».
— Скідваліся з суседзямі, самі падсыпалі дарогі асфальтнай дробкай, каб хоць неяк праехаць на машыне. Бо восенню і вясной, калі ідуць дажджы, тут суцэльнае балота. Улетку, калі суха, яшчэ больш-менш. Зімой нічога, але калі марозна. У слату — ні прайсці, ні праехаць.
Убачыць стан дарог у Паўднёвым-2 пад пластом снега журналісты не змаглі, але Юлія Барысаўна паказала фатаграфіі, на якіх і бруд, і лужыны, і машыны, якія захраслі ў «балоце».
— І вось па такіх дарогах нашы дзеці вымушаны кожны дзень хадзіць у школу пешшу! Гэта яшчэ адна праблема мікрараёна: пры яго праектаванні тут не запланавалі ніводнага прыпынку. Гэта значыць транспарт у Паўднёвы-2 пускаць не збіраліся!
Школьныя аўтобусы, звярнула ўвагу жанчына, дзяцей не забіраюць — яны жыхары горада, значыць, не паложана.
— Дзеці ідуць у школу пешшу, пераходзяць чыгуначны пераезд, а гэта ж зона павышанай небяспекі! Куды толькі не звярталася, каб гэтае пытанне вырашыць. У чэрвені 2024 года ў Фаніпалі пусцілі, нарэшце, тры гарадскія маршруты, у тым ліку, аўтобус да нашага мікрараёна. Але ні на адну вуліцу Паўднёвага-2 ён не заходзіць! Каб сесці на яго і даехаць да школы, дзецям прапануюць перасякаць ажыўленую дарогу. Пры гэтым пешаходнага пераходу там няма, а прыпыначны пункт не асветлены.
Аляксандр Турчын адказаў на гэта, што асноўныя дарогі прывядуць у парадак.
— Мы ў Фаніпаль у апошні час уклалі шмат сродкаў, увялі ў строй дастаткова аб'ектаў: садок, ФАК з басейнам. Хутка ў горадзе з'явіцца новая паліклініка, школа мастацтваў. За гэтыя грошы можна пабудаваць невялікі горад. Але згодзен з вамі: мікрараёны горада-спадарожніка добраўпарадкуем. Не абяцаю, што на працягу гэтага года ўсе дарогі ў Паўднёвым-2 заасфальтуем, але шкілетныя прывядзём у парадак. Зробім заезды грамадскага транспарту, — паабяцаў Аляксандр Турчын.
— За 2-3 гады зробім з Фаніпаля ўтульны гарадок, цалкам добраўпарадкаваны. Яго статут горада-спадарожніка абавязвае да гэтага, — дадаў ён.
Цяпер чытаюць
Арыштаваны вядомы неўролаг Руслан Бадамшын. Ён быў на хатняй хіміі15
Каментары