У Расіі выпадкова выдалі колькасць вайскоўцаў, якія зніклі без вестак?
48 тысяч тэстаў ДНК для апазнання парэшткаў расійскіх вайскоўцаў здалі іх сваякі. Гэтыя звесткі намесніца міністра абароны Расіі агучыла на круглым стале ў Дзярждуме. Кіраўнік камітэта Дзярждумы па абароне папрасіў нідзе больш «гэтыя лічбы не агучваць» і прыбраць такую інфармацыю з дакументаў, піша Astra.
Круглы стол Камітэта па працы, сацыяльнай палітыцы і справах ветэранаў на тэму «Заканадаўчае забеспячэнне мер сацыяльнай падтрымкі ўдзельнікаў СВА і членаў іх сем'яў (праблемы і шляхі іх вырашэння)» прайшоў у 10:00 раніцы паводле маскоўскага часу (аналагічны мінскаму) 26 лістапада.
Афіцыйна пра правядзенне круглага стала паведамляла расійскае Міністэрства абароны. Яго трансляцыя вялася на афіцыйным сайце Дзярждумы, але запісу трансляцыі на сайце не захавалася. Аднак жа яе паспеў запісаць адзін з чытачоў Astra.
На мерапрыемстве ў тым ліку выступала намесніца міністра абароны РФ і па сумяшчальніцтве нібыта стрыечная пляменніца Пуціна Ганна Цывілёва. Яна заявіла, што цяпер усе мужчыны, якія заключаюць кантракт з Мінабароны, здаюць тэсты ДНК. Гэтыя звесткі затым уносяцца ў базу МУС.
«Сваякоў ДНК мы таксама ўсё бяром, яны здаюць бясплатна, […] таксама ўносіцца ў базу. Усіх сваякоў, якія да нас звярнуліся — 48 тысяч», — паведаміла Цывілёва.
У адказ на гэта кіраўнік камітэта Дзярждумы па абароне Андрэй Картаполаў зрабіў ёй заўвагу:
«Калегі, пераканаўча вас прашу, гэтыя лічбы пра без вестак зніклых нідзе хай не фігуруюць. […] Гэта такая закрытая адчувальная інфармацыя. Калі будзем дакументы складаць выніковыя, таксама каб там гэтыя лічбы нідзе не плавалі».
Цывілева на гэта адказала: «Я назвала лічбы не зніклых, а зваротаў да нас. Многіх яны [сваякі] знойдуць. Таму гэтая лічба менавіта зваротаў, а не статыстыка».
Ідзе ў заяве Цывілёвай гаворка пра здачу ДНК 48 тысячамі сваякоў вайскоўцаў, якія зніклі без вестак, ці пра адзіную базу ДНК сваякоў вайскоўцаў, якія знаходзяцца ў зоне баявых дзеянняў — невядома.
Аднак раней сваякі расійскіх вайскоўцаў скардзіліся, што бясплатна здаць ДНК можна было толькі пры наяўнасці ў байца афіцыйнага статусу «без вестак зніклы». Такая ж інфармацыя даецца ў чатах сваякоў вайскоўцаў.
Пры гэтым, праўда, на сайце іркуцкага ўпаўнаважанага па правах чалавека сказана, што ДНК можна здаць і без такога статусу.
«Пры наяўнасці паведамлення са статусам без вестак зніклага вайскоўца, атрыманага ў вайсковым камісарыяце, працэдуру адбору матэрыялу ДНК можа арганізаваць вайсковы камісарыят па месцы жыхарства кроўнага сваяка, пры адсутнасці названага статусу ДНК можна здаць праз вайсковы следчы аддзел СК Расіі па Іркуцкім гарнізоне».
Цяпер чытаюць
«Пераапрануўся ў амапаўца і дырыжыраваў чорнай дубінкай». Адзін з заснавальнікаў «Вольнага хору» — пра акцыі ў гандлёвых цэнтрах у 2020‑м і працу ў філармоніі ў Літве2
Каментары
Ва Украіну адпраўце ДНК, там яны хутка знойдуцца.