На прэзідэнцкіх выбарах у Тайвані перамог непажаданы для Кітая кандыдат
Кандыдат ад кіроўнай Дэмакратычнай прагрэсіўнай партыі дзейны віцэ-прэзідэнт Лай Цындэ атрымаў каля 41% галасоў выбаршчыкаў.
Такія даныя прыводзіць ЦВК краіны пасля апрацоўкі 80% бюлетэняў.
Кандыдат ад Гаміньдана Хоу Юі, асноўны супернік Цындэ, набраў каля 33% галасоў і ўжо прызнаў сваё паражэнне, паведамляе выданне Focus Taiwan. За трэцяга кандыдата, кіраўніка Тайванскай народнай партыі Кэ Вэньчжэ, аддалі свае галасы каля 26% выбаршчыкаў.
Пасля перамогі Лай заявіў аб рашучасці «абараніць Тайвань ад пагроз і запалохвання з боку Кітая», падкрэсліўшы пры гэтым гатоўнасць да перамоваў з Пекінам «на аснове годнасці і парытэту».
«Як на прэзідэнце, на мне ляжыць вялікая адказнасць за падтрыманне міру і стабільнасці ў Тайванскім праліве», — заўважыў палітык перад сваімі прыхільнікамі ў Тайбэі.
Кітайскія ўлады называюць яго «завадатарам патэнцыйна небяспечнай вайны ў Тайванскім праліве».
Раней Лай Цындэ ў выпадку сваёй перамогі заяўляў пра намер скараціць эканамічную залежнасць ад Пекіна і працягнуць умацоўваць адносіны з ЗША.
За выбарамі на Тайвані назірае ўвесь свет, бо Пекін пагражае востраву вайной у выпадку, калі па іх выніках тайванцы захочуць абвясціць аб фармальнай незалежнасці ад Кітая.
Падчас перадвыбарнай кампаніі Лай усё ж адзначыў, што плануе захаваць статус-кво ў адносінах з Кітаем: не стане фармальна абвяшчаць незалежнасць Тайваня, але будзе катэгарычна адхіляць любыя дамаганні Пекіна на кантроль над востравам.
Напярэдадні выбараў кітайскія ўзброеныя сілы значна павысілі актыўнасць вакол Тайваня.
Тайванскае Міністэрства абароны заяўляе, што ў паветры вакол вострава курсіруюць восем кітайскіх вайсковых самалётаў, адзін з якіх парушыў паветраную прастору з паўднёва-заходняга боку а шостай раніцы паводле мясцовага часу — незадоўга да адкрыцця выбарчых участкаў.
Таксама ў суботняй заяве Мінабароны Тайваня гаворыцца, што шэсць кітайскіх вайсковых караблёў узялі востраў у кола.
«Узброеныя сілы [Тайваня] сочаць за сітуацыяй. Баявым паветраным патрулям, караблям ВМФ і наземным ракетным сістэмам даручана рэагаваць на варожыя дзеянні ў выпадку неабходнасці», — заявіла ваеннае ведамства Тайваня.
Раней ЗША не раз заяўлялі, што ўмяшаюцца ў сітуацыю ў рэгіёне ў выпадку ваеннай агрэсіі з боку Пекіна.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку20
Каментары