Дыпламатычны скандал паміж Беларуссю і Швецыяй: у Мінск адклікалі пасла Мірончыка
Для кансультацый у Стакгольм таксама адклікалі шведскага часовага паверанага ў Беларусі.
Пасля прызначэння шведскай прадстаўніцы пры беларускай дэмакратычнай супольнасці за мяжой амбасадаркі Крыстыны Юганэсан паміж афіцыйным Мінскам і Стакгольмам узнік дыпламатычны скандал, піша Радыё Свабода.
Як паведамілі Свабодзе ў прэс-службе МЗС Швецыі, «цяпер у Стакгольме для кансультацый знаходзіцца часовы павераны ў справах Швецыі ў Мінску. Праца ў амбасадзе Швецыі ў Мінску працягваецца ў звычайным рэжыме. Цяпер у Мінску для кансультацый знаходзіцца пасол Беларусі ў Стакгольме».
Паслом Беларусі ў Швецыі акрэдытаваны Дзмітрый Мірончык.
З 5 верасня 2022 года Ева Сундквіст выконвае абавязкі часовага паверанага ў справах Швецыі, кіраўніка місіі ў Мінску.
6 лістапада ў Вільні міністр замежных спраў Швецыі Тубіяс Більстрэм абвясціў аб прызначэнні Крыстыны Юганэсан, якая раней працавала амбасадаркай Швецыі ў Мінску, дыпламатычнай прадстаўніцай пры беларускай дэмакратычнай супольнасці за мяжой.
Апрача таго, Тубіяс Більстрэм 6 лістапада ў інтэрв'ю Свабодзе заявіў, адказваючы на пытанне, ці прызнае ён Святлану Ціханоўскую абраным прэзідэнтам:
«Мы прызнаём яе чалавекам, які перамог на выбарах і які па праву павінен быў стаць інаўгураваным прэзідэнтам Беларусі».
Паводле інфармацыі Свабоды, гэта выклікала незадавальненне ва ўладаў Беларусі, якія адклікалі свайго амбасадара са Стакгольма і запатрабавалі, каб у сталіцу Швецыі для кансультацый паехаў кіраўнік дыпламатычнай місіі гэтай краіны ў Мінску.
У замежнапалітычным ведамстве Швецыі Свабодзе таксама паведамілі, што пасля новага прызначэння Крыстыны Юганэсан МЗС Швецыі правёў перамовы з беларускімі прадстаўнікамі.
«У нас няма канкрэтных рэакцый, каб падзяліцца», — паведамілі ў прэс-службе Міністэрства замежных спраў Швецыі.
Цяпер чытаюць
Каментары
- рабы-манкурты которые лижут сапоги оркам и ненавидят все белорусское- это не дипломаты, а что то от гнойного табора / орчатни. Поэтому обидки предателей - манкуртов, это из оперы, как например, отключить ютуб, чтоб Тихановскую народ не посмотрел в НГ.