Беларуска Яна Шостак афіцыйна стала кандыдаткай у дэпутаты на польскіх парламенцкіх выбарах
Імя беларускі Яны Шостак з'явілася ў афіцыйным спісе кандыдатаў у польскі Сейм ад апазіцыйнай «Грамадзянскай кааліцыі». Шостак будзе балатавацца ад партыі «Зялёныя» ў Беластоку.
«Акруга 24, ад якой я буду браць удзел у выбарах, — гэта акруга Беластока і ваколіц. Што я адчуваю? Разумею, што найбліжэйшыя два месяцы мяне чакае шмат працы. Цяпер я шукаю каманду людзей, якія будуць дапамагаць мне рыхтавацца, а таксама хадзіць па мясцовых жыхарах і расказваць пра нашу кампанію», — расказала Яна Шостак «Еўрарадыё».
У выбарчым спісе Шостак месціцца на 13-м месцы.
У парламенце, калі б у яго прайшла, дзяўчына збіраецца займацца інтэграцыйнай палітыкай, прадстаўляць за мяжой беларусаў і падтрымліваць людзей з іншых краін, якім давялося эміграваць.
«Я ведаю, што ў Польшчы замежнікі сутыкаюцца са шматлікімі праблемамі на розных узроўнях. Вядома, дапамагаць можна і будучы актывісткай, але, як паказвае практыка, твой голас мае зусім іншую моц, калі ты дэпутатка і можаш на розных узроўнях размаўляць пра сістэмнае вырашэнне гэтых праблем», — казала Яна Шостак у адным з ранейшых інтэрв'ю.
Парламенцкія выбары ў Польшчы пройдуць 15 кастрычніка.
Яне Шостак 30 гадоў. Яна нарадзілася ў Гродне і з 17 гадоў жыве ў Польшчы, атрымала польскае грамадзянства. Яна вядомая сваімі перформансамі і акцыямі. Самая вядомая з іх — «Хвіліна крыку для Беларусі».
У 2022 годзе Шостак стала пераможцай прэстыжнага польскага конкурсу Paszporty Polityki.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары