Законы не працуюць, але «Правазнаўства» цэніцца. Якія спецыяльнасці ва ўніверсітэтах самыя дарагія
У 2023 годзе ВНУ Беларусі плануюць прыняць 52,2 тыс. новых студэнтаў. Чакаецца, што студэнтамі бюджэтнай формы навучання стануць 28,4 тыс. абітурыентаў, астатнія маюць вучыцца платна. «Экономическая газета» паглядзела, якія цяпер самыя прэстыжныя і адпаведна высокааплатныя спецыяльнасці ў некаторых беларускіх ВНУ.
У Беларускім дзяржаўным універсітэце кошт навучання студэнтаў-першакурснікаў у 2023/2024 навучальным годзе вагаецца ад 3,5 тыс. да 5,6 тыс. рублёў.
Найбольш высокі кошт навучання на юрыдычным факультэце, дзе на спецыяльнасцях «Правазнаўства» і «Эканамічнае права» за год студэнты заплацяць 5,567 тыс. руб. Столькі ж каштуе і «Міжнароднае права» на факультэце міжнародных адносін.
У Беларускім дзяржаўным універсітэце інфарматыкі і радыёэлектронікі (БДУІР) кошт навучання першакурснікаў на дзённым аддзяленні на спецыяльнасцях факультэта камп'ютарных сістэм і сетак складзе 4,590 тыс. руб. Столькі ж трэба будзе плаціць першакурснікам факультэта інфармацыйных тэхналогій і кіравання і інжынерна-эканамічнага факультэта.
У Беларускім дзяржаўным эканамічным універсітэце (БДЭУ) кошт навучання не разрозніваецца па спецыяльнасцях: усе першакурснікі дзённага аддзялення павінны будуць заплаціць 3,403 тыс. руб.
У Беларускім дзяржаўным педагагічным універсітэце імя Максіма Танка (БДПУ) кошт платнага навучання на першым курсе вар'іруецца ад 3,694 тыс. да 3,990 тыс. руб. Самыя дарагія — спецыяльнасці «Музычнае мастацтва, рытміка і харэаграфія», «Музычнае мастацтва і сусветная мастацкая культура».
Беларускі дзяржаўны медыцынскі ўніверсітэт (БДМУ) зафіксаваў кошт навучання ў дыяпазоне ад 4 тыс. да 5,2 тыс. руб. Самая дарагая спецыяльнасць — «Стаматалогія».
Што тычыцца рэгіянальных ВНУ, то, напрыклад, у Брэсцкім дзяржаўным універсітэце імя Пушкіна самая дарагая спецыяльнасць — «Правазнаўства» на юрыдычным факультэце. За год навучання першакурсніку трэба будзе заплаціць 3,727 тыс. руб.
Чытайце таксама:
БДТУ і БДПУ недабралі студэнтаў на бюджэтнае навучанне
«Неабходнасці ў іх функцыянаванні няма». У Мінску ліквідуюць два ліцэі
Былы памочнік Лукашэнкі Ігар Брыло прызнаў, што набраў хабараў на $2 мільёны10
Каментары