А можа не варта так часта касіць газон? Вось што пра гэта кажа навука

У Беларусі звычайна пачынаюць касіць траву ў канцы красавіка — пачатку мая, калі трава дасягае вышыні каля 10—15 см. Аднак канкрэтны момант залежыць ад кліматычных умоў у бягучым годзе і ад рэгіёна краіны, таму лепш арыентавацца на стан травы, а не толькі на каляндар. У любым выпадку рэгулярная касьба травы дапамагае падтрымліваць выгляд участка і спрыяе росту больш здаровай травы.

Падрыхтоўка да касьбы

Перад пачаткам касьбы з участка прыбіраюць усе прадметы, якія могуць нарабіць шкоды як інструменту, так і ўладальніку (садовыя фігуркі, каменьчыкі, галінкі, раскіданыя дзіцём цацкі і г. д.). Рэкамендуецца павырываць усё пустазелле, прайсціся па газоне з граблямі ці мяцёлкаю з жорсткімі прутамі для таго, каб выбраць сухую траву ці мох, разрыхліць глебу. Гэтая працэдура абавязковая пры першай касьбе і перад зімою.

Калі трава пасеяная ў тым жа годзе, то пры першай касьбе зразаюць толькі верхавіны на 1—2 см. Гэта дапаможа ёй кусціцца і стаць больш густой.

Аднак не трэба спяшацца з першай касьбой як маладога газона, так і старога. Затрымка кашэння вясною на некалькі тыдняў, як адзначаюць спецыялісты-біёлагі, павялічвае відавую разнастайнасць газонаў, бо трава — гэта сховішча для насякомых, а кветкі — іх ежа.

Пры правядзенні рэгулярнай касьбы вучоныя раяць пакідаць некаторыя ўчасткі газонаў некранутымі. Гэта знізіць негатыўнае ўздзеянне касьбы на жывёльны свет, бо будуць захаваныя кветкі і расліны, дзякуючы якім яны харчуюцца.

Калі газон перарос, то не спяшайцеся адразу ўсё скасіць «пад корань». Лепш правесці стрыжку за 2—3 разы на працягу некалькіх дзён, пачаўшы з укарачэння на адну трэць. Гэта дасць траве час адаптавацца.

Калі касіць

Лепш за ўсё касіць траву ў пахмурны, але не дажджлівы дзень. У такіх умовах трава лепш адаптуецца да пашкоджанняў. Не варта касіць траву ў моцна спякотны дзень, калі яна перасохла, бо гэта можа прывесці да пашкоджання каранёў і пагаршэння яе здароўя. Лепш за ўсё працаваць зранку ці вечарам.

Каб пазбегнуць пашкоджання каранёў і атрымаць больш роўны вынік, рэкамендуецца выкарыстоўваць востры інструмент і мяняць напрамак касьбы. Спачатку праходзяцца па траве ўздоўж, а наступным разам — упапярок. Так атрымаецца роўная паверхня.

Не трэба касіць траву і ў перыяды, калі пагражае засуха. Гэта дапаможа ўтрымаць ваду ў глебе. Спецыялісты раяць скошваць траву толькі ў месцах, дзе гэта неабходна, напрыклад, па меркаваннях бяспекі.

Як часта касіць і на якую вышыню

Перыядычнасць касьбы залежыць ад пары года і ўмоў надворʼя.

Звычайна ўвесну, калі трава знаходзіцца ў перыядзе актыўнага росту, гэта робяць раз ці два разы на тыдзень. Летам косяць раз на 10 дзён, а ўвосень — раз на два тыдні ці радзей.

Вышыня касьбы залежыць ад віду газона.

Апошнія гады сярод уладальнікаў прысядзібных участкаў набывае папулярнасць так званы маўрытанскі газон, на якім разам з травою расце шмат лугавых кветак. Такі газон патрабуе касьбы два разы на год, каб расліны паспявалі даваць насенне.

Што рабіць са скошанаю травою

Калі трава не збіраецца ў спецыяльны адсек газонакасілкі, то ў сухое і гарачае надворʼе яе лепш пакінуць раскіданаю. Так яна папрацуе ў якасці мульчы.

Калі ж чакаюцца дажджы ці стаіць вільготнае надворʼе, траву варта прыбраць. У адваротным выпадку яна пачне гнісці, будзе перашкаджаць выпарвацца лішняй вільгаці і стане месцам для росту грыбкоў.

З маўрытанскага газона траву абавязкова прыбіраюць.

Чытайце яшчэ:

Цвіце вішня — пара садзіць бульбу

Абразаеце сад? Не спяшайцеся выкідаць галінкі дрэваў і кустоў

Крапіва, медуніца, макрыца ды іншае пустазелле, якое ўзбагаціць ваш стол

• 36
• 0
• 19
• 13
• 7
• 25
• 57
• 0