Як выглядае і чым жыве Чарнігаў пасля аблогі — вялікі ФОТАРЭПАРТАЖ
Чарнігаў — адзін з гарадоў, які пасля пачатку вайны Расеі супраць Украіны асабліва пацярпеў ад абстрэлаў і бамбаванняў. У фотарэпартажы Ігара Бурдыгі для DW — пра тое, што цяпер адбываецца ў горадзе.
Месяц у аблозе
Вайна паставіла калісьці маляўнічы Чарнігаў на мяжу гуманітарнай катастрофы. У аблозе расейскімі войскамі прайшоў больш за месяц: з першых дзён уварвання да пачатку красавіка.
Удар па «Украіне»
Былая візітоўка Чарнігава — гасцініца «Украіна» на скрыжаванні цэнтральных праспектаў. Цяпер гэты будынак стаў адным з самых вядомых сімвалаў свядомага знішчэння горада. Яго разбурылі ракетным ударам ноччу 12 сакавіка.
Мэр горада-героя
«Гораду больш за 1000 гадоў, і ніколі не было прыкладаў, каб яго здавалі камусьці. Пасля таго, як я гэта заявіў, у мэрыю паляцелі 2 ракеты «Іскандэр». На жаль, яны ўпалі сярод дамоў, проста ў цэнтры горада. Вельмі шмат пацярпелых», — распавядае мэр Чарнігава Уладзіслаў Атрошанка.
Больш за ўсё пацярпелі жылыя дамы
Гарадскія ўлады і абласная адміністрацыя працягваюць падлічваць наступствы разбурэнняў. Яны ўжо зараз сыходзяцца ў адным — больш за ўсё пацярпелі жылыя дамы.
Пад руінамі
Выратавальныя службы працягваюць разбіраць завалы, выцягваючы з-пад іх маёмасць, а часам і целы мясцовых жыхароў.
Інфраструктура разбітая
Камунальнікі аднаўляюць працу сістэм жыццезабеспячэння. Чарнігаў да гэтага часу застаецца без ацяплення, у горадзе праблемы з водазабеспячэннем, электрычнасцю і сувяззю.
Без грошай і прадуктаў
Большасць крам і кірмашоў у Чарнігаве альбо зачыненыя, альбо разбураныя. Гараджане выжываюць за кошт гуманітарнай дапамогі.
Стадыён імя Гагарына
Стадыён футбольнага клуба «Дзясна» разбураны артылерыйскім абстрэлам 5 сакавіка і бамбардзіроўкай з паветра 11 сакавіка. Дапамагчы аднавіць спартыўную пляцоўку абяцаюць Нямеччына і Дортмундскі клуб «Барусія», гульцом якога ў свой час быў чарнігаўчанін Андрэй Ярмоленка.
Кнігі пад адкрытым небам
Музей старажытнасцяў і яго бібліятэка па суседстве са стадыёнам таксама былі разбураныя падчас сакавіцкай бамбардзіроўкі горада.
Яблыневы сад
Расійская армія скідала некіравальныя авіябомбы і на жылыя кварталы Чарнігава, дзе ў прыватных дамах пражывалі сотні грамадзянскіх асоб. На фота: паліцэйскі аглядае варонку ад бомбы на месцы былога яблыневага саду на ўскраіне горада.
Разбураныя тройчы
«Наш дом разбуралі тройчы: спачатку бомбамі, потым трапіў артылерыйскі снарад, а пасля проста спалілі, — распавядае мясцовая жыхарка Ганна Дораш. — Ну, як гаворыцца, ворага сюды не пусцілі. Толькі што пасля гэтага нам рабіць, мы не ведаем».
Баі за горад
Расейская армія абстрэльвала Чарнігаў з трох напрамкаў. З сакавіка баі, у тым ліку з ужываннем цяжкай тэхнікі, вяліся ўжо на ўскраінах горада. На фота: расійскі танк Т-80, падбіты на адной з вуліц Чарнігава.
Без месца для вучобы
За месяц аблогі ў Чарнігаве, паводле звестак мэрыі, пацярпелі 27 школ і 37 дзіцячых садкоў — ацалела толькі кожная пятая ўстанова. На фота: школа №18, разбураная падчас авіяналёту 3 сакавіка. Пад заваламі школы ратавальнікі знайшлі цела мужчыны.
Магілы брацкія і безыменныя
За месяц баёў у горадзе загінулі больш за 700 гараджан. Целы дзясяткаў дагэтуль не ідэнтыфікаваныя — некаторых з іх хавалі, нават не чакаючы блізкіх для апазнання.
Вяртацца пакуль небяспечна
Мясцовыя ўлады асцерагаюцца, што з-за разбурэння амаль усіх прамысловых прадпрыемстваў і прыпынку бізнэсу горад не хутка назбірае грошы на аднаўленне і нармальнае функцыянаванне. Гараджан папярэджваюць: жыць у Чарнігаве дагэтуль небяспечна.
Рэшткі мірнага жыцця
Мясцовыя вяртаюцца ў знішчаныя кватэры, каб забраць рэшткі ацалелых рэчаў. Андрэй пераехаў да сваякоў у глыб вобласці — уласнага жылля ў яго больш няма.
Эвакуацыя працягваецца
Дабрачынныя арганізацыі працягваюць вывозіць з Чарнігава тых, хто страціў дом і напалоханы вайной, у бяспечныя месцы. На фота: эвакуацыя падапечных яўрэйскага цэнтра пры гарадской сінагозе.
Цяпер чытаюць
Што Бабарыка і Калеснікава адказалі на пытанні пра вайну100
Каментары