Сям’ю Разановічаў, затрыманых па «справе Аўтуховіча», перавялі ў гродзенскую турму
Затрыманых 1 снежня 2020 года праваслаўнага святара Сяргея Разановіча, яго жонку Любоў і сына Паўла перавялі з брэсцкага СІЗА-7 у гродзенскую турму №1.
Там жа ўжо знаходзіцца былы палітвязень Мікалай Аўтуховіч і іншыя фігуранты справы. Іх родныя кажуць, што суд будзе праходзіць у Гродне, што тлумачыць пераводы абвінавачаных у турму №1, піша «Новы час».
Следства па «справе Аўтуховіча» скончанае і хутка будзе перададзенае ў суд. Па справе праходзіць 13 чалавек. Разановічаў, як і іншых, абвінавачваюць па арт. 289 Крымінальнага кодэкса — акт тэрарызму.
Вядома, што Аўтуховіч бываў у Брэсце ў гасцях у сям’і Разановічаў. Па версіі следства, сям’я нібыта дапамагала яму хавацца ад сілавікоў.
Любоў Разановіч раней валодала службай таксі, як і Аўтуховіч. Муж Любові Сяргей Разановіч — праваслаўны святар з вёскі Сцяпанкі Жабінкаўскага раёна.
Іх сын Павел Разановіч працаваў у аддзеле прымусовага выканання Ленінскага раёна Брэста.
Каментары