Улады зноў узяліся за нацыянальную ідэю. Абяцаюць сфармуляваць да 2023 года
Урад прыняў праграму патрыятычнага выхавання беларусаў. Сустрэчы з чыноўнікамі і сілавікамі павінны дапамагчы любіць сваю краіну. А яшчэ ўлады зноў узяліся за нацыянальную ідэю. Тысячы ідэолагаў так і не змаглі сфармуляваць яе, але да 2023 года, паводле дзяржпраграмы, ідэя павінна з’явіцца. А галоўнай падзеяй для беларусаў, лічаць ва ўрадзе, з’яўляецца перамога савецкага народа ў Другой сусветнай вайне.
У праграме сфармулявана, што з’яўляецца патрыятычнымі каштоўнасцямі:
- Радзіма і малая радзіма,
- пераемнасць пакаленняў і нацыя,
- дзяржаўнасць, суверэнітэт,
- дзяржаўная сімволіка,
- гістарычная памяць, нацыянальна-культурная ідэнтычнасць,
- сацыяльная і рэлігійная талерантнасць,
- нацыянальная і палітычная культура.
У межах праграмы наступныя чатыры гады будуць праводзіць дыскусіі, сустрэчы з прадстаўнікамі ўлады і ветэранамі (не толькі Другой сусветнай вайны, але і з ветэранамі Узброеных сіл), тэматычныя экскурсіі на працы чыноўнікаў, у вайсковых частках, вайскова-патрыятычныя класы, клубы і паходы, экскрусіі і спартовыя спаборніцтвы, выставы (у тым ліку на вайсковую тэму).
Акадэмія навук напярэдадні правяла сацыялагічнае апытанне, якое паказала, што сталае пакаленне больш за астатніх асацыюе Беларусь з зямлёй, якую абаранялі дзяды і прадзеды (46%). Трошкі больш за палову апытаных адказалі, што «быць патрыётам — значыць любіць Беларусь» (51 %), «жыць і працаваць у сваёй краіне дзеля яе дабрабыту» — 32 %, любіць беларускую мову і культуру — 27 %, паважаць дзяржаўныя сімвалы — 23 %.
58% беларусаў лічаць сябе патрыётамі, 25% не змаглі адказаць, 17 % не лічаць сябе патрыётамі Беларусі. Людзі сталага веку лічаць сябе патрыётамі больш, чым маладыя людзі ва ўзросце да 25 гадоў. Тое ж з дзяржаўнай сімволікай: яна ўяўляе каштоўнасць для 58% пенсіянераў, сярод моладзі — для 35%.
З апісання дзяржпраграмы, прыпраўленай пафасам, вынікае, што цэнтральнай тэмай патрыятычнага выхавання будзе перамога савецкага народа ў Другой сусветнай вайне. Улады спасылаюцца на сацапытанне: 44% заявілі, што ўклад беларускага народа ў Перамогу — галоўны прадмет нацыянальнага гонару.
У межах праграмы запланаваная выпрацоўка нацыянальнай ідэі, якую тысячы дзяржаўных ідэолагаў усё ніяк не могуць сфармуляваць. Цяпер абяцаюць прадставіць ідэю да 2023 года, займацца гэтым будуць у Акадэміі навук, Беларускім інстытуце стратэгічных даследаванняў і Акадэміі кіравання пры прэзідэнце. Таксама ў межах праграмы запланаваная перападрыхтоўка спецыялістаў, якія будуць вучыць беларусаў, як правільна быць патрыётамі.
Чытайце таксама: «Бліжэй да М'янмы, але не перайшоў у стадыю масавых забойстваў». Які ў Беларусі сёння палітычны рэжым?
Цяпер чытаюць
Феномен медыцынскага ўніверсітэта: кабала з размеркаваннем, невялікія заробкі, але ад абітурыентаў адбою няма1
Каментары