Нямецкі палітык: «Мяккая рэакцыя будзе ўспрынятая Пуціным як слабасць»
Нямецкі палітык Крыстаф Гойсген, які на працягу многіх гадоў быў дарадцам экс-канцлеркі Германіі Ангелы Меркель па знешняй палітыцы, у інтэрв'ю выдавецкаму аб'яднанню RedaktionsNetzwerk Deutschland (RND) абвінаваціў прэзідэнта Расіі Уладзіміра Пуціна ва ўслаўленні сталінскага рэжыму. Таксама ён перасцярог ад далейшага «экспансіянізму» з боку Масквы.
Па словах Гойсгена, «Пуцін жыве ў свеце ўласнай настальгіі, дзе міжнароднае права не мае ніякай ролі», а таксама «ўслаўляе Савецкі Саюз і нават рэжым Сталіна». Прэзідэнт Расіі, перакананы нямецкі палітык, «імкнецца да аднаўлення Расійскай імперыі, якая нагадвае Савецкі Саюз».
Каб гэтаму супрацьстаяць, Берлін, Брусель і Вашынгтон дакладна мусяць вызначыць свае пазіцыі ў дачыненні да Масквы.
«Мяккая рэакцыя будзе вытлумачаная Пуціным як слабасць і толькі будзе падахвочваць яго экспансіянісцкія жаданні», — адзначае Гойсген.
І лічыць, што Германія і Еўропа павінны выступаць на міжнароднай арэне больш актыўна, бо ЗША цяпер надта занятыя ўнутранай палітыкай.
66-гадовы Крыстаф Гойсген неўзабаве зойме пасаду кіраўніка Мюнхенскай канферэнцыі па бяспецы. Гэта штогадовая прэстыжная канферэнцыя, якая праводзіцца з 1962 года і ў якой удзельнічаюць вядучыя палітычныя і ваенныя лідары сусветных дзяржаў, палітолагі і прадстаўнікі СМІ. Менавіта на ёй Пуцін у 2007 годзе выступіў з т. зв. Мюнхенскай прамовай, якую многія палітолагі ацэньваюць як сімвалічны пачатак новай халоднай вайны.
Цяпер чытаюць
«З татам вырашылі: наспеў час вучыцца па-беларуску». Жанчына расказала, як у 80-я гады ездзіла за 20 кіламетраў ад Мінска дзеля адукацыі на роднай мове11
«З татам вырашылі: наспеў час вучыцца па-беларуску». Жанчына расказала, як у 80-я гады ездзіла за 20 кіламетраў ад Мінска дзеля адукацыі на роднай мове1
Зніклы Анатоль Котаў быў партнёрам самага высокапастаўленага беларускага разведчыка, які пераехаў у Польшчу. Тут можа быць ключ да разгадкі яго знікнення7979
Каментары