Караеў ужо набраў на Гродзеншчыне першы ўзвод нядбайных аграрыяў
На Гродзеншчыне плануюць накіраваць у войска некалькі дзясяткаў работнікаў, якія кепска праявілі сябе падчас жніва. Пра гэта паведаміў старшыня Гродзенскага аблвыканкама Юрый Караеў.
Па словах Юрыя Караева, у Гродзенскай вобласці налічылі каля 20—30 чалавек, якіх падазраюць у крадзяжах або нядобрасумленным выкананні сваіх абавязкаў падчас уборачнай кампаніі. Караеў жартам адзначыў, што з іх ужо можна «сабраць узвод».
Ён растлумачыў, што гаворка ідзе пра людзей, якія, замест таго каб працаваць на агульны вынік, нібыта спрабавалі атрымаць асабістую выгаду або вырашыць уласныя пытанні. Сярод магчымых парушэнняў называліся крадзяжы дызельнага паліва, бензіну, сродкаў для апрацоўкі раслін і камбікорму.
Як паведаміў кіраўнік Гродзенскай вобласці, гэтых работнікаў адабралі ваенкаматы і міліцыя на падставе хадайніцтваў старшыняў райвыканкамаў і кіраўнікоў сельскагаспадарчых прадпрыемстваў. Цяпер будзе вызначацца, да якой службы кожны з іх прыдатны.
Паводле слоў Караева, тых, хто прыдатны да службы са зброяй, могуць накіраваць, як раней і патрабаваў Аляксандр Лукашэнка, бліжэй да паўднёвай мяжы Беларусі. Іншых плануюць выкарыстоўваць у інжынерных падраздзяленнях для выканання абаронных работ — пераносіць шпалы, капаць, укладваць рэйкі або займацца будаўніцтвам дарог.
Кіраўнік Гродзенскага аблвыканкама выказаў меркаванне, што, маўляў, такая служба дапаможа гэтым людзям ацаніць розніцу паміж працай у сельскай гаспадарцы і армейскімі ўмовамі, пасля чаго яны змогуць вярнуцца на працу і падзяліцца сваім досведам з калегамі.
22 ліпеня падчас нарады, прысвечанай жніву, Лукашэнка, закранаючы праблему працоўнай дысцыпліны ва ўмовах дэфіцыту кадраў, заявіў, што замест прымянення іншых мер уздзеяння тых, «хто не ўмее працаваць», варта накіроўваць у войска і на паўднёвую мяжу краіны. Пасля гэтага чыноўнікі розных рангаў па ўсёй краіне кінуліся выконваць гэты загад ці прынамсі стараюцца паказаць, што ён выконваецца.
Вальфовіч пра ідэю адпраўляць аграрыяў-недарэк у войска: Гэта будзе спрыяць уборцы хлеба
Круты: Вайсковыя зборы для нядбайных аграрыяў будуць доўжыцца 2‑3 месяцы
Хрэнін расказаў, як будзе выконвацца загад Лукашэнкі аб адпраўцы аграрыяў-недарэк у войска
Лукашэнка распарадзіўся адпраўляць у армію ўсіх, хто не ўмее працаваць падчас жніва
Цяпер чытаюць
Беларуска ўладкавалася ў кандытарскую краму. Але высветлілася, што за наведванне туалета ёй трэба плаціць31
Каментары
Можа банда)