Зельцэра вызвалілі каля 22:00 на падставе ўказа Лукашэнкі аб памілаванні. З калоніі яго забірала супрацоўніца пасольства ЗША Кэралайн Сэвідж.
Амерыканскі юрыст Эмануіл Зельцэр, які 30 чэрвеня быў вызвалены з выпраўленчай калоніі Магілёва, вылецеў у ЗША 1 ліпеня ў 5:30. Пра гэта БелаПАН паведаміў яго адвакат Дзмітры Гарачка.
Зельцэра вызвалілі каля 22:00 на падставе ўказа прэзідэнта аб памілаванні. З калоніі яго забірала супрацоўніца пасольства ЗША Кэралайн Сэвідж. На пасольскай машыне Зельцэр быў дастаўлены ў Мінск.
Указ аб памілаванні Зельцэра быў падпісаны Аляксандрам Лукашэнкам 30 чэрвеня пасля яго сустрэчы з дэлегацыяй кангрэса ЗША.
«Ён затрыманы ў нашай краіне, асуджаны паводле беларускіх законаў, гэтага нават павераны ў справах ЗША у Беларусі Джонатан Мур не адмаўляе, — цытуе словы прэзідэнта яго прэс-служба.
— Ніколі не думаў, што гэты чалавек станецца пытаннем у стасунках між нашымі дзяржавамі. Так, паводле беларускіх законаў, паводле Канстытуцыі я магу памілаваць Эмануіла Зельцэра.
Вы звярнуліся да мяне з гэтай просьбай, ці не так? Калі гэта для Амерыкі вельмі важна і будзе садзейнічаць нармалізацыі нашых стасункаў, я сёння ж падпішу ўказ».
Часовы павераны ў справах ЗША Джонатан Мур вітаў рашэнне беларускіх уладаў пра вызваленне Зельцэра, назваўшы яго «крокам насустрач». «Далейшае развіццё адносін залежыць ад крокаў абодвух бакоў», — сказаў ён.
У жніўні 2008 года юрыст Зельцэр быў прыгавораны Мінскім гарадскім судом да трох гадоў пазбаўлення волі за выкарыстанне заведама непраўдзівых дакументаў і замах на камерцыйны шпіянаж. 31 кастрычніка Вярхоўны суд пакінуў прысуд у сіле. Сваёй віны Зельцэр не прызнаў.
8 чэрвеня Зельцэр аб'явіў галадоўку ў знак пратэсту супраць дзеянняў Мінскага гарсуда, які зацягваў падаванне ў калонію дакументаў, неабходных для яго амністыі. 25 чэрвеня асуджаны прыпыніў галадоўку да канца месяца.
Цяпер чытаюць
Раптоўна памяняўся кіраўнік Віцебскай вобласці. Прычынай назвалі хваробу 50‑гадовага Аляксандра Рагожніка2
Каментары