Дзяржаўны сакратар ЗША Майкл Пампеа 1 лютага сустрэўся з беларускімі праваабаронцамі падчас свайго візіту ў Мінск.
На сустрэчы прысутнічалі Сяргей Драздоўскі з Офісу па правах людзей з інваліднасцю, Алена Анісім з Таварыства беларускай мовы, старшыня праваабарончага цэнтра «Вясна» Алесь Бяляцкі і старшыня Беларускага Хельсінкскага Камітэта Алег Гулак, піша spring96.org.
Беларускія праваабаронцы паднялі найбольш важныя і злабадзённыя пытанні па правах чалавека ў Беларусі. У прыватнасці, Сяргей Драздоўскі распавёў пра праблемы, звязаныя з выкананнем сацыяльна-эканамічных правоў, з адсутнасцю антыдыскрымінацыйнага заканадаўства і парушэннем правоў прафсаюзаў. Алена Анісім звязала магчымасць існавання і актыўнай працы грамадскай супольнасці з пытаннем незалежнасці Беларусі, адзначыла важнасць у гэтай сітуацыі беларускай мовы і культуры, распавяла пра нядаўнія дэманстрацыі ў падтрымку незалежнасці.
Алесь Бяляцкі паведаміў пра стабільна кепскую сітуацыю з грамадска-палітычнымі правамі. Адзначыў, што парушаюцца правы на свабоду сходаў і мітынгаў, у якасці прыкладу прывёў апошнія мірныя дэманстрацыі ў падтрымку незалежнасці краіны, за ўдзел у якіх улады пакаралі дзясяткі ўдзельнікаў. Па ацэнцы праваабаронцы, улады не гатовыя супрацоўнічаць з грамадзянскай супольнасцю нават па такіх жыццёва важных пытаннях для Беларусі, як незалежнасць.
Алесь Бяляцкі адзначыў, што парушаюцца правы палітычных актывістаў, незалежных блогераў і актывістаў:
«На жаль, у краіне адсутнічаюць свабодныя выбары. Улада прыватызаваная, няма незалежнай судовай сістэмы, а заканадаўчая ўлада не адпавядае рэальным настроям у грамадстве. Мільёны беларусаў падтрымліваюць дэмакратычныя змены ў краіне. Але рэпрэсіямі ўлады ствараюць высокі ўзровень страху».
Праваабаронца звярнуў увагу і на тое, што пытанне незалежнасці Беларусі моцна звязана з комплекснымі зменамі па дэмакратызацыі грамадска-палітычнага жыцця ў краіне, і выказаў спадзяванне, што ЗША будзе спрыяць станоўчым зменам ва ўсім усходне-еўрапейскім рэгіёне, у прыватнасці ў такіх краінах, як Украіна, Малдова, Беларусь.
Алег Гулак у сваім выступе адзначыў важнасць амерыканска-беларускага дыялогу па правах чалавека і выказаўся за больш актыўнае прыцягненне грамадзянскай супольнасці ва ўсе перамоўныя працэсы паміж ЗША і Беларуссю.
Майкл Пампеа пракаментаваў выступы беларускіх праваабаронцаў, сказаў, што ёсць агульнае разуменне праблемаў, што ён падымаў найбольш важныя пытанні па правах чалавека ў Беларусі на сустрэчы з прэзідэнтам А. Лукашэнкам і міністрам замежных спраў У. Макеем. Ён таксама падкрэсліў, што пазіцыя ЗША па падтрымцы дэмакратыі і правоў чалавека ў Беларусі застаецца нязменнай.
Сустрэча з'явілася выразным сігналам урада ЗША ў падтрымку грамадзянскай супольнасці і дэмакратычных актывістаў у Беларусі.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага44
Каментары