«Інтэрбачанне» імітуе сваю папулярнасць: масоўку пераапранулі ў гледачоў-замежнікаў, на беларуску нацягнулі какошнік
Масоўцы загадалі радавацца мацней за гледачоў «Еўрабачання».
Арганізатары «Інтэрбачання» пераапранулі ў замежнікаў акцёраў масоўкі — замест грамадзян краін-удзельніц конкурсу, якія не прыехалі ў Расію, піша «Осторожно, новости».
У гэтыя выходныя ў Маскве праходзіць генеральная рэпетыцыя шоу. За ўдзел у масоўцы за два працоўныя дні абяцаюць 6 тысяч расійскіх рублёў (каля 250 беларускіх рублёў).
Гледачоў «Інтэрбачання» іграюць каля васьмісот чалавек, сярод іх — не больш за два дзясяткі замежнікаў. Пры ўваходзе на Live Аrene размясцілі касцюмерную, дзе акцёрам масоўкі выдавалі атрыбутыку краін-удзельніц «Інтэрбачання»: сцягі, футболкі і нацыянальныя касцюмы.
«Усе не могуць заўзець за Расію», — папярэдзілі прадстаўнікі Першага канала.
Спачатку арганізатары ацэньвалі людзей па тыпажы, а потым вызначалі адпаведную краіну. На выбар: Індыя, ААЭ, Бразілія, Сербія, Беларусь, Куба, Катар і інш. Такім чынам арганізатары прапанавалі гледачам «падтрымаць» тыя краіны, чые грамадзяне не прыехалі на конкурс.
Як піша тэлеграм-канал, падчас рэпетыцыі на экране дэманстравалі кадры «Еўрабачання» мінулых гадоў.
«Мы павінны радавацца лепш, чым яны. Самыя вясёлыя людзі ў Расіі і самыя шчаслівыя», — казалі арганізатары.
Карэспандэнт «Осторожно, новости» сустрэўся з двума маладымі людзьмі з М’янмы, якія вучацца ў Расіі. Пра «Інтэрбачанне» яны даведаліся ад аднакурснікаў і прыйшлі, каб «патанцаваць». Адзін з іх атрымаў футболку са сцягам Кітая. М’янма на конкурсе не прадстаўлена.
На адным з фота можна пабачыць беларускую заўзятарку: у яе — дзяржаўны сцяг, а на галаве чамусьці какошнік.
«Мне грошы патрэбныя. Ну і з Кіркоравым ноч правесці. Дрэнна ці што?» — патлумачыла яшчэ адна ўдзельніца здымак. Паводле яе слоў, яна часта ходзіць на запісы розных тэлевізійных шоу.
Напярэдадні ў групе для масоўкі арганізатары абвясцілі, што ўсе ўдзельнікі прайшлі праверку службы бяспекі. Перад пачаткам здымак яны падпісалі дамову.
Згодна з ёй, акцёры масоўкі абавязаліся падчас запісу конкурсу не дыскрэдытаваць расійскую армію і не дэманстраваць нацысцкую і экстрэмісцкую сімволіку. Удзельнікам забаранілі прыходзіць у вопратцы «жоўтых і блакітных адценняў».
Акрамя таго, акцёрам масоўкі забаранілі здымаць відэа і фатаграфаваць у канцэртнай зале. Тым, хто парушыць правілы, пагражалі штрафамі ў 500 тыс. рублёў і «разбіральніцтвам са службай бяспекі і юрыстамі Першага канала».
Набор масоўкі на здымкі «Інтэрбачання» абвясцілі тыдзень таму.
Сам конкурс адбудзецца 20 верасня. Паводле арганізатараў, у ім возьмуць удзел прадстаўнікі 23 краін (большасць з іх — дзяржавы БРІКС і СНД).
Расію будзе прадстаўляць Shaman, ад Беларусі паедзе Насця Краўчанка.
Нагадаем, Беларусь і Расія адхіленыя ад удзелу ў штогадовым міжнародным конкурсе «Еўрабачанне». Таму ў Расіі вырашылі аднавіць «Інтэрбачанне», якое праводзілася ў 70-я-80-я гады мінулага стагоддзя пад эгідай савецкага і польскага тэлебачання.
Цяпер чытаюць
Пяць дзён, 60 удзельнікаў, саўна, більярд і крыкі адзін на аднаго. Расказваем, як прайшла закрытая «гульня Мацкевіча»42
Каментары
Заўзець, Наша Ніва, заўзець.
[Зрэдагавана]