«Interbačańnie» imituje svaju papularnaść: masoŭku pieraapranuli ŭ hledačoŭ-zamiežnikaŭ, na biełarusku naciahnuli kakošnik
Masoŭcy zahadali radavacca macniej za hledačoŭ «Jeŭrabačańnia».
Arhanizatary «Interbačańnia» pieraapranuli ŭ zamiežnikaŭ akcioraŭ masoŭki — zamiest hramadzian krain-udzielnic konkursu, jakija nie pryjechali ŭ Rasiju, piša «Ostorožno, novosti».
U hetyja vychodnyja ŭ Maskvie prachodzić hienieralnaja repietycyja šou. Za ŭdzieł u masoŭcy za dva pracoŭnyja dni abiacajuć 6 tysiač rasijskich rubloŭ (kala 250 biełaruskich rubloŭ).
Hledačoŭ «Interbačańnia» ihrajuć kala vaśmisot čałaviek, siarod ich — nie bolš za dva dziasiatki zamiežnikaŭ. Pry ŭvachodzie na Live Arene raźmiaścili kaściumiernuju, dzie akcioram masoŭki vydavali atrybutyku krain-udzielnic «Interbačańnia»: ściahi, futbołki i nacyjanalnyja kaściumy.
«Usie nie mohuć zaŭzieć za Rasiju», — papiaredzili pradstaŭniki Pieršaha kanała.
Spačatku arhanizatary aceńvali ludziej pa typažy, a potym vyznačali adpaviednuju krainu. Na vybar: Indyja, AAE, Brazilija, Sierbija, Biełaruś, Kuba, Katar i inš. Takim čynam arhanizatary prapanavali hledačam «padtrymać» tyja krainy, čyje hramadzianie nie pryjechali na konkurs.
Jak piša telehram-kanał, padčas repietycyi na ekranie demanstravali kadry «Jeŭrabačańnia» minułych hadoŭ.
«My pavinny radavacca lepš, čym jany. Samyja viasiołyja ludzi ŭ Rasii i samyja ščaślivyja», — kazali arhanizatary.
Karespandent «Ostorožno, novosti» sustreŭsia z dvuma maładymi ludźmi z Mjanmy, jakija vučacca ŭ Rasii. Pra «Interbačańnie» jany daviedalisia ad adnakurśnikaŭ i pryjšli, kab «patancavać». Adzin ź ich atrymaŭ futbołku sa ściaham Kitaja. Mjanma na konkursie nie pradstaŭlena.
Na adnym z fota možna pabačyć biełaruskuju zaŭziatarku: u jaje — dziaržaŭny ściah, a na hałavie čamuści kakošnik.
«Mnie hrošy patrebnyja. Nu i z Kirkoravym noč pravieści. Drenna ci što?» — patłumačyła jašče adna ŭdzielnica zdymak. Pavodle jaje słoŭ, jana časta chodzić na zapisy roznych televizijnych šou.
Napiaredadni ŭ hrupie dla masoŭki arhanizatary abviaścili, što ŭsie ŭdzielniki prajšli pravierku słužby biaśpieki. Pierad pačatkam zdymak jany padpisali damovu.
Zhodna ź joj, akciory masoŭki abaviazalisia padčas zapisu konkursu nie dyskredytavać rasijskuju armiju i nie demanstravać nacysckuju i ekstremisckuju simvoliku. Udzielnikam zabaranili prychodzić u vopratcy «žoŭtych i błakitnych adcieńniaŭ».
Akramia taho, akcioram masoŭki zabaranili zdymać videa i fatahrafavać u kancertnaj zale. Tym, chto parušyć praviły, pahražali štrafami ŭ 500 tys. rubloŭ i «raźbiralnictvam sa słužbaj biaśpieki i jurystami Pieršaha kanała».
Nabor masoŭki na zdymki «Interbačańnia» abviaścili tydzień tamu.
Sam konkurs adbudziecca 20 vieraśnia. Pavodle arhanizataraŭ, u im voźmuć udzieł pradstaŭniki 23 krain (bolšaść ź ich — dziaržavy BRIKS i SND).
Rasiju budzie pradstaŭlać Shaman, ad Biełarusi pajedzie Naścia Kraŭčanka.
Nahadajem, Biełaruś i Rasija adchilenyja ad udziełu ŭ štohadovym mižnarodnym konkursie «Jeŭrabačańnie». Tamu ŭ Rasii vyrašyli adnavić «Interbačańnie», jakoje pravodziłasia ŭ 70-ja-80-ja hady minułaha stahodździa pad ehidaj savieckaha i polskaha telebačańnia.
Ciapier čytajuć
Što viadoma pra biełarusa, jaki zahinuŭ la Elbrusa8
Kamientary
Zaŭzieć, Naša Niva, zaŭzieć.
[Zredahavana]