У Афганістане з-пад завалаў пасля землятрусу найперш ратавалі мужчын, а жанчын пакідалі
Мясцовыя жыхары кажуць, што ратавальнікі эвакуіравалі параненых мужчын і дзяцей, а жанчын і дзяўчат адсоўвалі ўбок праз забарону на кантакты паміж мужчынамі і жанчынамі.
У Афганістане пасля разбуральнага землятрусу жанчыны былі вымушаныя заставацца пад заваламі, пакуль ратавальнікі дапамагалі мужчынам і дзецям. З-за забароны на кантакты паміж мужчынамі і жанчынамі, якія не з'яўляюцца сваякамі, многія ахвяры засталіся без дапамогі. Некаторыя чакалі, пакуль жанчыны з іншых вёсак прыедуць і дастануць іх, піша выданне «The New York Times».
«Яны сабралі нас у адным куце і забыліся пра нас. Ніхто да нас не падышоў, ніхто не спытаў, што нам трэба», — сказала 19-гадовая Айша з правінцыі Кунар. Яна сказала, што многія жанчыны і дзяўчаты-падлеткі, нават тыя, што сцякалі крывёй, засталіся без дапамогі.
Валанцёр-мужчына Тахзібула Мухазеб распавёў, што мужчынскія медыцынскія брыгады не спяшаліся выцягваць жанчын з-пад руін будынкаў.
«Здавалася, што жанчыны былі нябачныя. Мужчын і дзяцей ратавалі адразу, а жанчыны сядзелі збоку і чакалі дапамогі», — сказаў ён.
У Афганістане строгія культурныя і рэлігійныя нормы, якія выконваюцца ўрадам Талібана, толькі блізкі сваяк мужчынскага полу — бацька, брат, муж ці сын — можа дакранацца да жанчыны. Тое ж самае тычыцца і адваротнага: жанчынам не дазваляецца дакранацца да мужчын па-за межамі сваёй сям'і. У зонах бедства жанчынам-ратавальніцам забаронена дапамагаць мужчынам. Але жанчына можа выцягваць жанчын.
У выпадках, калі побач не было сваякоў мужчынскага полу, ратавальнікі выцягвалі жанчын толькі за вопратку, каб пазбегнуць фізічнага кантакту.
Прадстаўніца структуры «ААН-жанчыны» ў Афганістане Сьюзан Фергюсан падкрэсліла: «Жанчыны і дзяўчаты зноў найбольш пакутуюць ад гэтай катастрофы, таму іх патрэбы павінны быць у цэнтры ўвагі».
Афганістан ужо некалькі гадоў сутыкаецца з недахопам медыцынскіх работнікаў, асабліва жанчын. У мінулым годзе талібы забаранілі жанчынам вучыцца ў медыцынскіх установах, што толькі пагоршыла праблему.
1 жніўня ў Афганістане адбыўся магутны землятрус магнітудай 6 балаў, пасля якога адбылося як мінімум 17 паўторных землятрусаў.
Паводле звестак урада Афганістана, загінула больш за 2200 чалавек, а яшчэ 3600 атрымалі раненні.
Цяпер чытаюць
Фіналістак конкурсу «Міс Беларусь — 2025» вывелі на сцэну ў касцюмах з цытатамі Лукашэнкі28
Каментары
[Зрэдагавана]