Самалёт прэм'ера Арменіі ўпершыню выкарыстаў паветраную прастору Азербайджана
Упершыню за амаль 30 гадоў Арменія і Азербайджан пачалі выкарыстоўваць паветраную прастору адно аднаго. Самалёт прэм’ер-міністра Арменіі Нікала Пашыняна падчас замежнай паездкі праляцеў над тэрыторыяй Азербайджана, паведаміла ягоная прэс-сакратарка Назелі Багдасар’ян.
Чыноўніца нагадала, што азербайджанскія барты ўжо даўно лятаюць праз Арменію, каб злучаць асноўную частку краіны з эксклавам Нахічэванню. Паводле армянскага выдання Hetq, цяпер і армянскія авіякампаніі пачалі карыстацца азербайджанскай паветранай прасторай, а «Азербайджанскія авіялініі» — лётаць над Арменіяй.
Такія змены сталі магчымымі пасля нармалізацыі адносін паміж дзвюма краінамі. 8 жніўня ў Белым доме прэм’ер Арменіі Нікол Пашынян і прэзідэнт Азербайджана Ільхам Аліеў у прысутнасці прэзідэнта ЗША Дональда Трампа падпісалі пагадненне пра транспартны калідор праз тэрыторыю Арменіі да Нахічэвані. Таксама быў апублікаваны праект мірнай дамовы паміж дзвюма краінамі. Дакумент прадугледжвае адмову ад тэрытарыяльных прэтэнзій і ад ужывання сілы.
Да гэтага Арменія і Азербайджан амаль тры дзесяцігоддзі не карысталіся паветранай прасторай адзін аднаго з-за канфлікту вакол Нагорнага Карабаха. Гэты канфлікт вычарпаў сябе пасля таго, як у 2023 годзе азербайджанскія войскі выцеснілі з рэгіёна армянскія, а армянскае насельніцтва (каля 100 тысяч чалавек) цалкам пакінула зямлю продкаў.
Каментары