Караткевіч не хоча віншаваць Лукашэнку з перамогай і будзе ўдзельнічаць у парламенцкіх выбарах
Паслявыбарчая прэс-канферэнцыя экс-кандыдаткі ў прэзідэнты Таццяны Караткевіч праходзіць у рэстаране на плошчы Незалежнасці. Пачынаецца з невялікім спазненнем, пачатковыя словы Караткевіч чытае з паперкі — відаць што стамілася за час кампаніі. Прамаўляе упэўнена і, падаецца, з палёгкай. Асноўны мэсідж — «мы змаглі атрымаць падтрымку ад 20 да 30% грамадства» і «цяпер пачынаем наступны этап».
Караткевіч амаль адразу заяўляе, што збіраецца ўдзельнічаць у парламенцкіх выбарах у якасці кандыдата ў дэпутаты. «Мы будзем рабіць усё, каб ад словаў улада перайшла да справы», — гаворыць Караткевіч.
Афіцыйных вынікаў выбараў Караткевіч не прызнае і таму, адпаведна, віншаваць Лукашэнку з перамогай не хоча. Хаця і гаворыць, што «за Лукашэнку на гэтых выбарах прагаласавала больш людзей, чым за мяне».
«Гэтыя выбары сталі пачаткам мірных перамен. Я гатовая ісці наперад… Гэта першая прэс-канферэнцыя маёй новай выбарчай кампаніі», — гаворыць Караткевіч журналістам.
«Я сабрала ад 10 да 30% на розных участках», — перакананая экс-кандыдатка. «Мы збярэм усе заўвагі, усю інфармацыю аб парушэннях і пададзім гэта ў Вярхоўны суд», — кіраўнік штаба Караткевіч Андрэй Дзмітрыеў настроены ваяўніча.
«Самай галоўнай памылкай гэтай кампаніі было тое, што мы доўга чакалі адзінага кандыдата і не рашаліся зрабіць гэты крок (самастойнае вылучэнне Караткевіч). Гэта самае галоўнае. Позні старт», — лічыць былая кандыдатка ў прэзідэнты.
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары