Беларус пікетаваў МЗС у Варшаве з распілаванай машынай ФОТАФАКТ
Аўтар перфоманса заклікае да скасавання візаў і крытычнай самаідэнтыфікацыі.
Беларускі мастак і візуальны артыст Аляксандр Міхаловіч правёў пікеты каля гіпермаркета ў Белай-Падляшскай (Польшча) і на польска-беларускай мяжы, а затым і каля польскага Міністэрства замежных спраў у Варшаве, распавядае Onliner.by. Асаблівасцю пікетаў стала палова машыны.
Аўтар хоча звярнуць увагу на жыццёвую праблему: маўляў, «беларусы — санітары Еўропы, якія вывозяць непатрэбныя ЕС тавары і пры гэтым сутыкаюцца з праблемамі ў атрыманні візаў».
Ён лічыць, што візіты беларусаў «на закупы» ў Еўропу патрэбныя еўрапейцам не менш, чым беларусам, якім прыходзіцца стаяць у чэргах па візы, а часам і атрымліваць штрафы. Але больш яго турбуе тое, што мэтай паездак беларусаў у Еўропу часцей становіцца спажыванне, а не адукацыя, гісторыя, мастацтва ці проста вандроўкі.
Машыну для інсталяцыі Аляксандр набыў у Польшчы, распілаваў з сябрамі за паўтара дня. Замацаваў колы так, каб паўмашыны можна было каціць. Затым начыніў манекенамі і тыповымі закупамі беларусаў.
Паводле яго слоў, палякі ля гіпермаркета цікавіліся акцыяй, а беларусы хмурыліся і адыходзілі ў бок. Рэакцыя мытнікаў была падобнай да апошніх. Пад МЗС ахоўнік патрабаваў прыбраць аўто («А як я яе магу прыбраць? Замест рухавіка — памперсы», — адказваў мастак) і выклікаў паліцыю, але штрафаваць аўтара не сталі.
Цяпер Аляксандр пакінуў паўмашыны ў Польшчы (пра лёс другой паловы не паведамляецца), але хоча выставіць інсталяцыю «санітараў Еўропы» ў галерэйнай прасторы Польшчы ці Беларусі.
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары