«Доні Дарка»

БТ, 21.40

Доні Дарка (Donnie Darko)
ЗША, 2001, каляровы, 113 хв (рэжысэрская вэрсія 133 хв.)
Рэжысэр: Рычард Келі
Ролі выконваюць: Джэйк Джыленгал, Джына Мэлоўн, Патрык Сўэйзі, Дру Бэрымар, Кэтрын Рос, Голмз Озбарн, Мэгі Джыленгал, Мэры МакДонэл, Джэймз Дзюваль, Бэт Грант, Ной Ўайл
Жанр: Падлеткавы трызьненьнік, арт-гаўзны містычны трымценьнік, фантастыка
Прызы: Прыз фэсту фантастычных фільмаў у Жэрарме, Адмысловы прыз амэрыканскай Акадэміі фантастыкі, прыз глядацкіх сымпатый кінафэсту фантастычных фільмаў у Швэцыі, намінацыя на галоўны прыз кінафэсту ў Сандэнсе – усяго 11 узнагародаў і 9 намінацый
Адзнака: 8 (з 10)

Старшаклясьнік Доні Дарка ходзіць у сьненьнях і прачынаецца на суседзкіх палетках. Падчас чарговага начнога шпацыру невядомы ў масцы страхалюднага труса прадказвае Доні Канец сьвету праз 28 дзён. Хлопец вяртаецца дадому – але ягоны ложак прабіты турбінаю самалёта, які так і не знаходзяць. Псыхіятарка вымагае ад героя прызнаньняў, але ці ня ёсьць хлапечыя трызьненьні пазнакай вандровак у часе?

Поўнамэтражны дэбют Рычарда Келі – адзін з сама дзіўных фільмаў дзесяцігодзьдзя. Студыйныя маркетолягі так і не прыдумалі, у якім жанры прасоўваць стужку – падлеткавай драмы, фантастыкі, хорару, авангарду ці палітычнай сатыры. Карціна Келі – хлапечы варыянт “Алісы ў краіне цудаў”. Гісторыя сталеньня з уцёкамі ў палахлівыя галюцынацыі – дзе кашмарныя маскі, падпал чужых дамоў… і нечаканыя цытаты.

Пачатак карціны спрачаецца з “Апошнім спакушэньнем Хрыста”, вечарына падлеткаў нагадвае атмасфэру з “Лаліты” Стэньлі Кубрыка, а трус-разбуральнік зьяўляецца абавязковым героем рамана Рычарда Адамса “Пагоркі Ўотэршып”. Кадры “Злобных мерцьвякоў”, што глядзяць героі – стаюцца фантастычным парталам, а апавяданьне Грэма Грына “Разбуральнікі” – кіраўніцтвам да дзеяньня.

Пры гэтым карціна надзвычай цэласная – чаму зарукаю й музыка Майкла Эндруса, і бліскучыя акторскія працы. Прапаведнік і тайны вычварэнец (Патрык Сўэйзі), гратэскная настаўніца-дура (Бэт Грант), маці героя (Мэры МакДонэл), сяброўка Доні (Джына Мэлоўн) – і, безумоўна, сам герой-самнамбул, які мусіць абраць паміж сваім жыцьцём ці жыцьцём іншых (Джэйк Джыленгал).

Сэансы "сур’ёзнага" псыхааналізу мантажуюцца з ідыёцкімі відэакурсамі, падлеткавы гвалт – з кічавым танцам, галюцынацыі – з гістэрычнымі бацькоўскімі сходамі.

Падлеткавая шызафрэнія, спантанныя машыны часу, распазнаваньне провіду, пераадоленьне наканаваньня, ахвярнасьць, дэманічныя інсьпірацыі… Келі грае зь лічбай “8”, іранізуе з адукацыі й лекаваньня – і сьплятае магічны твор, дзе магчымы разнастайныя тлумачэньні.

На міжнародным кінапартале imdb.com “Доні Дарка” ўваходзіць у сьпіс 250 найпапулярнейшых фільмаў.

Усе фільмы

• 0
• 0
• 0
• 0
• 0
• 0
• 0
• 0