«Doni Darka»

BT, 21.40

Doni Darka (Donnie Darko)
ZŠA, 2001, kalarovy, 113 chv (režyserskaja versija 133 chv.)
Režyser: Ryčard Kieli
Roli vykonvajuć: Džejk Džylenhał, Džyna Mełoŭn, Patryk Sŭejzi, Dru Berymar, Ketryn Ros, Hołmz Ozbarn, Mehi Džylenhał, Mery MakDoneł, Džejmz Dziuval, Bet Hrant, Noj Ŭajł
Žanr: Padletkavy tryźnieńnik, art-haŭzny mistyčny trymcieńnik, fantastyka
Pryzy: Pryz festu fantastyčnych filmaŭ u Žerarmie, Admysłovy pryz amerykanskaj Akademii fantastyki, pryz hladackich sympatyj kinafestu fantastyčnych filmaŭ u Švecyi, naminacyja na hałoŭny pryz kinafestu ŭ Sandensie – usiaho 11 uznaharodaŭ i 9 naminacyj
Adznaka: 8 (z 10)

Staršaklaśnik Doni Darka chodzić u śnieńniach i pračynajecca na susiedzkich paletkach. Padčas čarhovaha načnoha špacyru nieviadomy ŭ mascy strachaludnaha trusa pradkazvaje Doni Kaniec śvietu praz 28 dzion. Chłopiec viartajecca dadomu – ale jahony łožak prabity turbinaju samalota, jaki tak i nie znachodziać. Psychijatarka vymahaje ad hieroja pryznańniaŭ, ale ci nia jość chłapiečyja tryźnieńni paznakaj vandrovak u časie?

Poŭnametražny debiut Ryčarda Kieli – adzin z sama dziŭnych filmaŭ dziesiacihodździa. Studyjnyja markietolahi tak i nie prydumali, u jakim žanry prasoŭvać stužku – padletkavaj dramy, fantastyki, choraru, avanhardu ci palityčnaj satyry. Karcina Kieli – chłapiečy varyjant “Alisy ŭ krainie cudaŭ”. Historyja staleńnia z uciokami ŭ pałachlivyja halucynacyi – dzie kašmarnyja maski, padpał čužych damoŭ… i niečakanyja cytaty.

Pačatak karciny spračajecca z “Apošnim spakušeńniem Chrysta”, viečaryna padletkaŭ nahadvaje atmasferu z “Łality” Steńli Kubryka, a trus-razburalnik źjaŭlajecca abaviazkovym hierojem ramana Ryčarda Adamsa “Pahorki Ŭoteršyp”. Kadry “Złobnych mierćviakoŭ”, što hladziać hieroi – stajucca fantastyčnym partałam, a apaviadańnie Hrema Hryna “Razburalniki” – kiraŭnictvam da dziejańnia.

Pry hetym karcina nadzvyčaj cełasnaja – čamu zarukaju j muzyka Majkła Endrusa, i bliskučyja aktorskija pracy. Prapaviednik i tajny vyčvareniec (Patryk Sŭejzi), hratesknaja nastaŭnica-dura (Bet Hrant), maci hieroja (Mery MakDoneł), siabroŭka Doni (Džyna Mełoŭn) – i, biezumoŭna, sam hieroj-samnambuł, jaki musić abrać pamiž svaim žyćciom ci žyćciom inšych (Džejk Džylenhał).

Seansy "surjoznaha" psychaanalizu mantažujucca ź idyjockimi videakursami, padletkavy hvałt – z kičavym tancam, halucynacyi – z histeryčnymi baćkoŭskimi schodami.

Padletkavaja šyzafrenija, spantannyja mašyny času, raspaznavańnie providu, pieraadoleńnie nakanavańnia, achviarnaść, demaničnyja inśpiracyi… Kieli hraje ź ličbaj “8”, iranizuje z adukacyi j lekavańnia – i śplataje mahičny tvor, dzie mahčymy raznastajnyja tłumačeńni.

Na mižnarodnym kinapartale imdb.com “Doni Darka” ŭvachodzić u śpis 250 najpapularniejšych filmaŭ.

Usie filmy

• 0
• 0
• 0
• 0
• 0
• 0
• 0
• 0