U pytańni stratehii pieramahajuć "amatary trusoŭ"? :-)
Zaraz u apazycyi možna čakać uzmacnieńnia prarasiejskich siłaŭ. Piša ŭ svaim błohu Alaksandar Kłaskoŭski.
Kali ŭčora ja razmaŭlaŭ ź Mikołam Statkievičam, toj skazaŭ: hałoŭnaje vyrašycca na pačatku kanhresu.
Sapraŭdy, były palitviazień, pieršym paprasiŭšy "try chviliny paśla dvuch hadoŭ", prapanavaŭ adrazu razhledzieć pytańnie stratehii demakratyčnaha ruchu. Jak viadoma, jon raspracavaŭ jaje alternatyŭny varyjant. Prychilnikam ža prajektu, uchvalenaha balšynioj Palitrady, Statkievič paraiŭ syści z palityki dy zaniacca hadoŭlaj trusoŭ i chamiakoŭ.
Zrešty, jahonyja apanenty ličać, što ŭ dakumencie, vyłučanym ad imia "Eŭrapejskaj kaalicyi" i patetyčna nazvanym "stratehijaj zmahańnia" (u piku "stratehii čakańnia"), ničoha asablivaha niama. Maŭlaŭ, reč nie ŭ kanceptualnych razychodžańniach, a ŭ ambicyjach.
Tak ci inačaj, prapanovu ab stratehičnaj alternatyvie ź pieravahaj u 26 hałasoŭ adchilili.
Kidajecca ŭ vočy nievysoki "adsotak jaŭki". 568 delehataŭ z 916. Možna kazać ab častkovym bajkocie.
Siońnia Milinkievič zajaviŭ žurnalistam, što bačyć u kaalicyi dva bloki: levy i praniezaležnicki. Mikoła Statkievič učora ŭ razmovie sa mnoj sprahnazavaŭ padobny vynik mierapryjemstva. Tolki biez zališniaj palitkarektnaści skazaŭ ab "prarasiejskaj" płyni.
Sapraŭdy, možna čakać uzmacnieńnia hetaha kryła. My ŭžo bačyli symptomy kštałtu našumiełaha "Mienskaha manifestu" Sinicyna i Parfianoviča. Zrazumieła, što Maskva pierad nastupnymi elektaralnymi kampanijami budzie šukać tut apiryšča dy ŭkidać resursy. Mahčyma, źjavicca jašče nie adzin "prajekt Karakin". Niezaležnickim siłam daviadziecca vytrymać žorstkuju kankurencyju.
A pakul što budźma sačyć za chadoju mierapryjemstva ŭ DK aŭtazavodu. Darečy, aperatyŭna aśviatlajuć padzieju "Svaboda" i "Radyjo Racyja".
Kamientary