«Źjavilisia šancy na vyratavańnie». Piakarnia LJoN, jakaja abviaściła pra zakryćcio, pakul praciahnie pracu
Dziakujučy vialikaj padtrymcy naviedvalnikaŭ i kaleh pa śfiery, u zasnavalnikaŭ piakarni ŭsio ž źjavilisia novyja šancy zmahacca za jaje zachavańnie na tym ža miescy.
Pazaŭčora źjaviłasia infarmacyja, što Minsku zakryvajecca papularnaja piakarnia «Lon» (LJoN). Pra spynieńnie pracy ŭstanova paviedamiła na svajoj staroncy ŭ Instagram 18 červienia. Apošnim rabočym dniom prajekta miełasia stać zaŭtra, adnak u piatnicu stała viadoma: pakul piakarnia praciahnie pracu i dalej, piša Onliner.by.
Pryčynaj zakryćcia stała skasavańnie damovy arendy pamiaškańnia na vulicy Rakaŭskaj, 25/1. Pa słovach uładalnikaŭ, mienavita ŭ hetym budynku raźmiaščałasia vytvorčaść — heta značyć, zakryvajecca ŭvieś prajekt, a nie tolki adnajmiennaja kaviarnia.
— My piać miesiacaŭ u sudzie zmahalisia za svajo prava praciahvać pracu ŭ hetym miescy, bo mienavita tut raźmieščana nie tolki naša kaviarnia, ale i vytvorčaść, i skasavańnie damovy pa sutnaści aznačaje hibiel kampanii. Na žal, učora my prajhrali apielacyjny sud, — paviedamili ŭ čaćvier pradstaŭniki piakarni. Uładalniki adznačyli, što pryniali rašeńnie spynić dalejšuju baraćbu, bo jana bolš «nie adpaviadaje tym kaštoŭnaściam i metam, dziela jakich stvaraŭsia prajekt».
Apošni dzień pracy «Lna» byŭ zapłanavany na 21 červienia. Paśla hetaha ŭstanova pavinna była zakrycca dla naviedvalnikaŭ. Ale ŭčora stała viadoma, što niadziela — nie apošni rabočy dzień «Lonu».
Dziakujučy vialikaj padtrymcy naviedvalnikaŭ i kaleh pa śfiery, u zasnavalnikaŭ piakarni ŭsio ž źjavilisia novyja šancy zmahacca za jaje zachavańnie na tym ža miescy. Pra heta raskazała ŭładalnica prajekta Alena Kazłoŭskaja.
Na staroncy ŭstanovy ŭžo źjaviŭsia novy dopis z krychu bolš dobrymi navinami, čym učora.
— Ščyra skažam: my pakul nie viedajem, jak buduć raźvivacca padziei dalej i kolki času zmožam praciahvać pracu ŭ biahučym farmacie. Ale vielmi spadziajomsia, što ŭsie pracesy buduć adbyvacca ŭ miežach zakanadaŭstva i my zmožam svoječasova paviedamlać vam pra ŭsie źmieny.
Kamanda «Lonu» prosić pastavicca z razumieńniem da čerhaŭ, zatrymak i pierabojaŭ u asartymiencie: ustanova ŭžo była nastrojena zakryvacca, a zanadta šmat minčan pryjšło ź joj raźvitvacca.
Taksama Alena Kazłoŭskaja patłumačyła, što pieranos vytvorčaści i kaviarni ŭ inšaje miesca małavierahodny z-za mnohich pryčyn. Faktyčna pierajezd budzie aznačać zapusk prajekta z nula. «Heta ŭžo budzie nie toj «Lon»», — prakamientavała ŭładalnica.
Ciapier čytajuć
Minskija ŭłady raskazali, jak buduć zmahacca z «akijanam aŭtamabilaŭ» u dvarach2
Kamientary