U Krakavie aficyjna zarehistravali Asacyjacyju biełaruskich vydaŭcoŭ — pieršuju prafiesijnuju arhanizacyju, jakaja abjadnoŭvaje biełaruskich vydaŭcoŭ niezaležna ad taho, dzie jany ciapier pracujuć.
Ideja zasnavańnia arhanizacyi była aformlenaja jašče ŭ listapadzie 2025 hoda padčas fiestyvalu intelektualnaj knihi Pradmova ŭ Varšavie. Tady adzinaccać pradstaŭnikoŭ vydavieckaj śfiery padpisali dekłaracyju ab supracoŭnictvie i vykazali hatoŭnaść stvaryć ahulnuju prafiesijnuju strukturu. Praź niekalki miesiacaŭ hetaja zadumka atrymała jurydyčnaje ŭvasableńnie ŭ Polščy.
Stvaralniki Asacyjacyi adznačajuć, što jaje źjaŭleńnie niepasredna źviazana z tymi ŭmovami, u jakich siońnia isnuje biełaruskaje knihavydańnie. Unutry Biełarusi niezaležnyja vydaviectvy i kulturnyja arhanizacyi sutyknulisia z surjoznymi abmiežavańniami, mnohija byli likvidavanyja abo pazbaŭlenyja mahčymaści paŭnavartasna pracavać. U vyniku značnaja častka biełaruskaha knižnaha siektara pieramiaściłasia za miežy krainy. Pavodle acenak zasnavalnikaŭ, siońnia za miažoj dziejničaje bolš za dva dziasiatki biełaruskich vydaviectvaŭ, pryčym najbolšaja ich kolkaść pracuje ŭ Polščy.
Novaja arhanizacyja zaklikanaja dapamahčy hetym vydaviectvam dziejničać bolš zładžana. Jana budzie zajmacca kaardynacyjaj supolnych prajektaŭ, pradstaŭleńniem intaresaŭ biełaruskich vydaŭcoŭ, raźvićciom mižnarodnych kantaktaŭ i pošukam novych mahčymaściaŭ dla supracoŭnictva. Važnaj zadačaj taksama nazyvajecca pradstaŭleńnie biełaruskaha knižnaha siektara na mižnarodnaj arenie jak adzinaj prafiesijnaj supolnaści.
Kiraŭnikom Asacyjacyi abranaja Valancina Barbara Andrejeva. Namieśnikam staršyni staŭ Illa Andrejeŭ.
Siarod najbližejšych płanaŭ arhanizacyi — praviadzieńnie ahulnaha schodu, na jakim budzie vyznačany paradak pryniaćcia novych siabraŭ. Taksama płanujecca raspracoŭka etyčnaha kodeksa biełaruskaha vydaŭca i pašyreńnie ŭdziełu biełaruskaj knihi ŭ kulturnych mierapryjemstvach biełaruskaj dyjaspary ŭ roznych krainach.
Asacyjacyja taksama zajaviła pra adkrytaść da supracoŭnictva z zamiežnymi vydavieckimi arhanizacyjami, kulturnymi ŭstanovami, knižnymi kirmašami i ŭsimi, chto padtrymlivaje pryncypy svabodnaha słova i niezaležnaj kultury.
Cichanoŭskaja naviedała biełaruski stend na Mižnarodnym knižnym kirmašy ŭ Varšavie
Vydańnie «Ruiny Biełarusi» pryznali adnoj z najpryhažejšych polskich knih
Čatyrnaccać vydaviectvaŭ, kala paŭtysiačy knih… Zasnavalniki novaj varšaŭskaj kniharni Kamunikat.shop raskazali pra dalejšyja płany
Bialacki: «Treba vydavać knihi na biełaruskaj movie. Pa-rusku knihi treba vydavać u Rasii». Fiaduta aburyŭsia
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu44
Kamientary