Biežaniec z Sudana sprabavaŭ adrezać hałavu miascovamu žycharu pasiarod Biełfasta. U Paŭnočnaj Irłandyi ŭspychnuli biesparadki
Niekalki čałaviek adbili susieda z dapamohaj kluški dla tradycyjnaj kielckaj hulni ź miačom. 40‑hadovy paciarpieły straciŭ levaje voka.
Napad adbyŭsia kala pałovy adzinaccataj viečara 8 červienia na Kinejrd-avieniu ŭ Paŭnočnym Biełfaście — cichaj žyłoj vulicy, zabudovanaj troch– i čatyrochpaviarchovymi damami. Napadnik — biežaniec z Sudana, achviara — miascovy žychar.
Na videazapisie, jaki raspaŭsiudziŭsia ŭ sacyjalnych sietkach, vidać, jak ciemnaskury mužčyna siadzić na čałavieku, što lažyć na śpinie pasiarod vulicy. U rukach napadnika nož. Na paciarpiełym bačnyja ślady kryvi. Niekatoryja vidavočcy paźniej śćviardžali, što napadnik sprabavaŭ adrezać achviary hałavu.
Jak paviedamlajecca, paciarpiełamu sprabavali dapamahčy niekalki čałaviek. Abiaškodzić złačyncu zdoleŭ miascovy žychar Majciu Mak Tyhiernan (Maitiu Mag Tighearnan) z dapamohaj kluški dla chiorlinhu — tradycyjnaj kielckaj hulni ź miačom.
Pavodle palicyi, supracoŭniki prybyli na miesca praź niekalki chvilin paśla vykliku. Jany aryštavali padazravanaha, a taksama pačali akazvać pieršuju dapamohu paciarpiełamu. Nieŭzabavie na miesca prybyli bryhady chutkaj dapamohi.
Paciarpiełaha 40‑hadovaha mužčynu dastavili ŭ balnicu ź ciažkimi traŭmami vačej, a taksama rezanymi ranami tvaru i śpiny.
Palicyja paviedamiła, što na miescy zdareńnia byŭ znojdzieny pradmiet, jaki, na dumku śledčych, źjaŭlajecca kuchonnym nažom.
Paźniej palicyja Paŭnočnaj Irłandyi pradjaviła abvinavačańnie ŭ zamachu na zabojstva 30‑hadovamu ŭradžencu Sudana. Pavodle Ministerstva ŭnutranych spraŭ Vialikabrytanii, mužčyna atrymaŭ status biežanca ŭ 2023 hodzie i maje prava zastavacca ŭ krainie da 2028 hoda.
Jak piša BBC, kiraŭnik palicyi Paŭnočnaj Irłandyi Džon Butčer paviedamiŭ, što padazravany spačatku vyjechaŭ z Sudana ŭ Paryž, zatym samalotam prybyŭ u Dublin, a paśla aŭtobusam dabraŭsia da Biełfasta 10 lutaha 2023 hoda — u dzień, kali padaŭ prašeńnie ab prytułku.
Pavodle Butčera, imia padazravanaha nie fihuravała ni ŭ adnoj z nacyjanalnych baz danych, źviazanych z pahrozami biaśpiecy, i jon nie byŭ viadomy Palicejskaj słužbie Paŭnočnaj Irłandyi.
Kiraŭnik palicyi zaklikaŭ hramadskaść nie pieraškadžać rasśledavańniu i nie paddavacca ŭpłyvu infarmacyi, jakaja raspaŭsiudžvajecca ŭ sacyjalnych sietkach.
Adnak užo na nastupny dzień paśla napadu ŭ Biełfaście pačalisia antyimihracyjnyja pratesty. Ich padstavaj stali sam napad i šakujučyja kadry napadu, jakija masava razyšlisia ŭ internecie.
Pratesty chutka pieraraśli ŭ biesparadki. Udzielniki padpalvali aŭtamabili i budynki. U horadzie časova spynili hramadski transpart.
Pažarna-vyratavalnaja słužba Paŭnočnaj Irłandyi paviedamiła, što bolšaść incydentaŭ adbyłasia ŭ rajonie Vialikaha Biełfasta. Dla likvidacyi nastupstvaŭ daviałosia pryciahnuć dadatkova 21 pažarnuju mašynu z roznych rajonaŭ Paŭnočnaj Irłandyi.
Na fonie napružanaj situacyi palicyja abviaściła pra ŭzmacnieńnie svajoj prysutnaści na vulicach horada ŭ najbližejšyja dni.
Padčas pieršaha sudovaha pasiadžeńnia 10 červienia prakuror paviedamiŭ, što paciarpieły Styvien Ohiłvi (Stephen Ogilvie) straciŭ levaje voka. 30‑hadovamu Chadzi Aładzidu (Hadi Alodid) vystavili abvinavačańni ŭ zamachu na zabojstva, niezakonnym vałodańni nažom i pahrozach zabojstvam. Padčas słuchańnia jon admoviŭsia ad jurydyčnaj dapamohi i nie adkazaŭ na pradjaŭlenyja jamu abvinavačańni.
Tym časam historyja Majciu Mak Tyhiernana, jaki dapamoh spynić napadnika, vyklikała šyroki vodhuk u internecie. Karystalniki arhanizavali zbor srodkaŭ «na pintu piva» dla mužčyny. Za karotki čas było zroblena amal 700 achviaravańniaŭ na ahulnuju sumu bolš za 5800 funtaŭ.
Kamientary