Rasijskuju žurnalistku, jakaja pracuje ŭ prajekcie «Biełsata», chočuć vysłać z Francyi
Ministerstva ŭnutranych spraŭ Francyi admoviła ŭ vydačy dazvołu na žycharstva rasijskaj žurnalistcy Irynie Ananinaj, jakaja pracuje ŭ prajekcie telekanała Biełsat «Vot Tak», i zapatrabavała ad jaje pakinuć krainu. Jak paviedamlaje «Radyjo Svaboda», pra pryčyny admovy pry hetym nie paviedamili. Ananina ŭžo piać hadoŭ žyvie ŭ Francyi, a jaje muž — francuzski hramadzianin.
Iryna Ananina — z Sankt-Pieciarburha, raniej jana pracavała ŭ haziecie «Diełovoj Pietierburh» i ŭ pieciarburhskaj redakcyi radyjo «Echo Moskvy». U 2020‑ch hadach pačała supracoŭničać ź miedyjaprajektam «Vot Tak», a ŭ 2021 hodzie pierajechała ŭ Francyju, dzie praz hod vyjšła zamuž za francuza Biertrana Bale, ź jakim była znajomaja da hetaha niekalki hadoŭ.
Paśla viasiella Iryna padała ŭ MUS zajavu na atrymańnie dazvołu na žycharstva z pryčyny ŭźjadnańnia ź siamjoj. Zajavu razhladali bolš za 2 hady, a ŭ pačatku žniŭnia jana atrymała admovu i paviedamleńnie pra vydvareńnie z Francyi.
Ananina sprabavała dakumientalna paćvierdzić, što maje prava žyć u Francyi z mužam. Mer horada, dzie jany žanilisia, nakiravaŭ u prefiekturu Manpielje paćviardžeńnie, što asabista rehistravaŭ ich šlub, i jon nie źjaŭlajecca fiktyŭnym.
Pa słovach Ananinaj, supracoŭniki prefiektury ŭ pryvatnaj razmovie namiaknuli joj na mahčymyja składanaści ŭ afarmleńni dazvołu praź jaje rasijskaje hramadzianstva. Advakat rasijskaj hramadzianki Dźmitryj Zachvataŭ zajaviŭ, što rašeńnie ab vysyłcy niezakonnaje i parušaje pravy abodvuch sužencaŭ. Jon płanuje abskardzić adpaviednuju pastanovu.
Miedyjaprajekt «Vot Tak» stvorany ŭ 2017 hodzie jak častka biełaruskaj niezaležnaj kampanii «Biełsat». Jaho meta — raspaŭsiudžvańnie abjektyŭnaj infarmacyi pra hramadskaje i palityčnaje žyćcio ŭ Biełarusi i śviecie, a taksama supraćstajańnie rasijskaj i biełaruskaj prapahandzie. Paśla 2020 hoda praz uzmacnieńnie represij suprać niezaležnych ŚMI minskaja redakcyja Biełsata pierajechała ŭ Polšču i ciapier źjaŭlajecca častkaj mižnarodnaha viaščańnia nacyjanalnaj polskaj kampanii TVP. U mai 2022 hoda ŭ Rasii hety kanał zabłakavali na patrabavańnie Hienieralnaj prakuratury Rasii, a ŭ studzieni 2024 hoda Ministerstva justycyi Rasii pryznała prajekt «Vot Tak» «inšaziemnym ahientam».
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni4
Kamientary