Расійскую журналістку, якая працуе ў праекце «Белсата», хочуць выслаць з Францыі
Міністэрства ўнутраных спраў Францыі адмовіла ў выдачы дазволу на жыхарства расійскай журналістцы Ірыне Ананінай, якая працуе ў праекце тэлеканала Белсат «Вот Так», і запатрабавала ад яе пакінуць краіну. Як паведамляе «Радыё Свабода», пра прычыны адмовы пры гэтым не паведамілі. Ананіна ўжо пяць гадоў жыве ў Францыі, а яе муж — французскі грамадзянін.
Ірына Ананіна — з Санкт-Пецярбурга, раней яна працавала ў газеце «Деловой Петербург» і ў пецярбургскай рэдакцыі радыё «Эхо Москвы». У 2020‑х гадах пачала супрацоўнічаць з медыяпраектам «Вот Так», а ў 2021 годзе пераехала ў Францыю, дзе праз год выйшла замуж за француза Бертрана Бале, з якім была знаёмая да гэтага некалькі гадоў.
Пасля вяселля Ірына падала ў МУС заяву на атрыманне дазволу на жыхарства з прычыны ўз'яднання з сям'ёй. Заяву разглядалі больш за 2 гады, а ў пачатку жніўня яна атрымала адмову і паведамленне пра выдварэнне з Францыі.
Ананіна спрабавала дакументальна пацвердзіць, што мае права жыць у Францыі з мужам. Мэр горада, дзе яны жаніліся, накіраваў у прэфектуру Манпелье пацвярджэнне, што асабіста рэгістраваў іх шлюб, і ён не з'яўляецца фіктыўным.
Па словах Ананінай, супрацоўнікі прэфектуры ў прыватнай размове намякнулі ёй на магчымыя складанасці ў афармленні дазволу праз яе расійскае грамадзянства. Адвакат расійскай грамадзянкі Дзмітрый Захватаў заявіў, што рашэнне аб высылцы незаконнае і парушае правы абодвух сужэнцаў. Ён плануе абскардзіць адпаведную пастанову.
Медыяпраект «Вот Так» створаны ў 2017 годзе як частка беларускай незалежнай кампаніі «Белсат». Яго мэта — распаўсюджванне аб'ектыўнай інфармацыі пра грамадскае і палітычнае жыццё ў Беларусі і свеце, а таксама супрацьстаянне расійскай і беларускай прапагандзе. Пасля 2020 года праз узмацненне рэпрэсій супраць незалежных СМІ мінская рэдакцыя Белсата пераехала ў Польшчу і цяпер з'яўляецца часткай міжнароднага вяшчання нацыянальнай польскай кампаніі TVP. У маі 2022 года ў Расіі гэты канал заблакавалі на патрабаванне Генеральнай пракуратуры Расіі, а ў студзені 2024 года Міністэрства юстыцыі Расіі прызнала праект «Вот Так» «іншаземным агентам».
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»7
Каментары