Maskvičy padtrymali biełarusa-dyryžora, jakomu treba było zdavać ispyt u pustoj zale Hniesinki. Byŭ anšłah!
Biełarus Siarhiej Danilkievič vučycca ŭ mahistratury Hniesinki (Rasijskaj akademii muzyki) na dyryžora. Jon raspavioŭ u instahramie, što budzie zdavać ispyt pry pustoj zali. U vyniku kvitki na kancert raschapali za niekalki hadzin.
Siarhiej Danilkievič naradziŭsia na Brestčynie — u horadzie Ivanava. Z 6 hadoŭ chłopčyk pačaŭ zajmacca muzykaj, skončyŭ Ivanaŭskuju dziciačuju škołu mastactvaŭ imia Napaleona Ordy.
Mienavita tam jon zasvoiŭ bajan — nastaŭnica Siarhieja Śviatłana Zinovik nazyvała chłopca svaim samym talenavitym vučniem za 36 hadoŭ pracy. Na jaho rachunku było šmat pieramoh u muzyčnych konkursach.
U 9 kłasie, kali paŭstała pytańnie — praciahvać zajmacca muzykaj ci šukać niejkuju bolš ziamnuju śpiecyjalnaść, — Siarhiej vybraŭ pieršaje. U vyniku pastupiŭ u muzyčnaje vučylišča imia Hlinki.
A paśla pajechaŭ užo ŭ Maskvu, dzie skončyŭ Rasijskuju akademiju muzyki imia Hniesinych — vučyŭsia na kafiedry bajana i akardeona.
U 2022 hodzie Siarhiej viarnuŭsia na radzimu — imavierna, pytańnie było ŭ tym, što jon musiŭ adsłužyć u vojsku. Muzyku adrazu zabrali ŭ śpiecnaz — u 5‑j asobnuju bryhadu śpiecyjalnaha pryznačeńnia, jakaja raźmiaščajecca ŭ Marjinaj Horcy.
Padčas słužby chłopiec muzyki nie zakinuŭ — jaho čas ad času adpraŭlali na konkursy patryjatyčnaj pieśni (u tym liku ŭ Rasiju). Jon napisaŭ pieśniu da Dnia PDV i SSA — śpiavaŭ pra suviaź śpiecnazu i desantnych vojsk.
Ciapier Siarhiej znoŭ vučycca ŭ Hniesincy — ciapier užo ŭ mahistratury na dyryžora. Abaronu dypłomnaha prajekta pastavili na 26 maja na 14.30.
Śpiecyjalnaść tvorčaja, tamu i abarona prachodzić u formie kancertu. Ale Siarhieja zasmučała toje, što treba było vystupać pierad pustoj załaj — biełarusu nie było kaho paklikać dla maralnaj padtrymki.
Mienš za tydzień da ispytu budučy dyryžor vykłaŭ u instahramie videazvarot:
— Ja budu dyryžyravać arkiestram u Hniesincy. Kancert biaspłatny, ale ŭ mianie niama siabroŭ i znajomych, kaho ja moh by siudy paklikać. Tamu kliču vas. Prychodźcie, budu vielmi rady bačyć. Spadziajusia na vašu padtrymku, vieru ŭ moc instahrama.
Rolik nabraŭ 520 tysiač prahladaŭ, amal 54 tysiačy łajkaŭ i bolš za 7 tysiač repostaŭ. U vyniku rehistracyju pryjšłosia zakryć praź niekalki hadzin (a zała raźličana bolš čym na 500 miescaŭ).
Siarhiej raspavioŭ, što atrymaŭ niejmaviernuju kolkaść słoŭ padtrymki. Ale da apošniaha chvalavaŭsia: raptam adbudziecca tak, što značnaja kolkaść ludziej usio ž nie pryjdzie.
Strachi nie zbylisia: u zali byŭ anšłah. Pryjšli i žurnalisty — biełarus staŭ sapraŭdnaj zorkaj. Siarhiej nazyvaje hety dzień adnym z samych ščaślivych u žyćci.
Kaža, dziakujučy nieabyjakavym ludziam jon pavieryŭ u svaje siły. I choć pakul nie maje svajho kalektyvu, vielmi spadziajecca jaho znajści. Siarhiej abiacaje, što pra jaho jašče pačujuć.
Kali vam raptam cikava, što Siarhieju pastaviła ŭ vyniku kamisija, dyk možam vas supakoić — jon atrymaŭ piaciorku, najvyšejšuju adznaku.
Ciapier čytajuć
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ11
Kamientary