Staŭ viadomy prysud, vyniesieny baćku byłoha palitviaźnia Mikity Załatarova
Pravaabaroncam «Viasny» stała viadoma, što Michaiłu Łapunovu pryznačyli piać hadoŭ pazbaŭleńnia voli ŭ kałonii ŭzmocnienaha režymu. Žorstki prysud mužčynu adpravili adbyvać u vaŭkavyskuju kałoniju №11.
Michaiła Łapunova, baćku palitźniavolenaha Mikity Załatarova, jakoha miesiac tamu vyzvalili i vydvaryli ź Biełarusi — zatrymali 8 žniŭnia 2023 hoda. Jaho siem razoŭ zapar adpraŭlali na 15 sutak pa administracyjnych spravach.
Pravaabaroncy pryznali Michaiła Łapunova palitźniavolenym jašče padčas administracyjnaha aryštu.
U čas, kali mužčynu ŭtrymlivali na sutkach, KDB pryznaŭ zakryty telehram-čat «Homiel za Nikitu Zołotarieva», uładalnikam jakoha byŭ Michaił Łapunoŭ, «ekstremisckim farmavańniem». Za heta suprać Łapunova zaviali kryminalnuju spravu za «stvareńnie ekstremisckaha farmavańnia» (č. 1 art. 361‑1 KK) i «sadziejničańnie ekstremisckaj dziejnaści» (č. 1 i 2 art. 361‑4 KK).
U žniŭni 2024 hoda spravu palitviaźnia ŭ Homielskim abłasnym sudzie razhladała Alesia Osipava. Jana pryznačyła Michaiłu Łapunovu piać hadoŭ pazbaŭleńnia voli ŭ kałonii ŭzmocnienaha režymu.
22 listapada 2024 hoda Michaiła ŭnieśli ŭ «śpis ekstremistaŭ». Termin mužčyna adbyvaje ŭ kałonii №11 u Vaŭkavysku.
Syna Michaiła Mikitu Załatarova zatrymali 11 žniŭnia 2020 hoda, kali chłopcu było jašče 16 hadoŭ. Jon niadaŭna raskazaŭ «Jeŭraradyjo», što ŭ toj dzień nie ŭdzielničaŭ u pratestach, a jechaŭ da baćki:
«Ja pajechaŭ da baćki, jon u toj dzień byŭ na rybałcy. Dniom my z maci afarmlali dakumienty ŭ vajenkamacie. My pozna pryjechali, a potym ja vyrašyŭ pajechać da baćki parybalić».
19 sakavika 2025 hoda jaho pamiłavali i vydvaryli z krainy. Ciapier chłopcu 21 hod. Mikita — chvory na epilepsiju. Jon paviedamiŭ, što jašče za try dni da vyzvaleńnia znachodziŭsia pad kropielnicaj, a vyzvalili jaho prosta z ŠIZA.
Piensijaniery, aktyvisty, šmatdzietnyja baćki: chto trapiŭ u śpis z 250 pamiłavanych palitviaźniaŭ
Śpis palitviaźniaŭ, vyzvalenych 19 sakavika — i departavanych, i tych, chto zastajecca ŭ Biełarusi
Pačynajuć sudzić baćku palitviaźnia Mikity Załatarova. Jamu pahražaje da siami hadoŭ kałonii za padtrymku syna
Kamientary