Стаў вядомы прысуд, вынесены бацьку былога палітвязня Мікіты Залатарова
Праваабаронцам «Вясны» стала вядома, што Міхаілу Лапунову прызначылі пяць гадоў пазбаўлення волі ў калоніі ўзмоцненага рэжыму. Жорсткі прысуд мужчыну адправілі адбываць у ваўкавыскую калонію №11.
Міхаіла Лапунова, бацьку палітзняволенага Мікіты Залатарова, якога месяц таму вызвалілі і выдварылі з Беларусі — затрымалі 8 жніўня 2023 года. Яго сем разоў запар адпраўлялі на 15 сутак па адміністрацыйных справах.
Праваабаронцы прызналі Міхаіла Лапунова палітзняволеным яшчэ падчас адміністрацыйнага арышту.
У час, калі мужчыну ўтрымлівалі на сутках, КДБ прызнаў закрыты тэлеграм-чат «Гомель за Никиту Золотарева», уладальнікам якога быў Міхаіл Лапуноў, «экстрэмісцкім фармаваннем». За гэта супраць Лапунова завялі крымінальную справу за «стварэнне экстрэмісцкага фармавання» (ч. 1 арт. 361‑1 КК) і «садзейнічанне экстрэмісцкай дзейнасці» (ч. 1 і 2 арт. 361‑4 КК).
У жніўні 2024 года справу палітвязня ў Гомельскім абласным судзе разглядала Алеся Осіпава. Яна прызначыла Міхаілу Лапунову пяць гадоў пазбаўлення волі ў калоніі ўзмоцненага рэжыму.
22 лістапада 2024 года Міхаіла ўнеслі ў «спіс экстрэмістаў». Тэрмін мужчына адбывае ў калоніі №11 у Ваўкавыску.
Сына Міхаіла Мікіту Залатарова затрымалі 11 жніўня 2020 года, калі хлопцу было яшчэ 16 гадоў. Ён нядаўна расказаў «Еўрарадыё», што ў той дзень не ўдзельнічаў у пратэстах, а ехаў да бацькі:
«Я паехаў да бацькі, ён у той дзень быў на рыбалцы. Днём мы з маці афармлялі дакументы ў ваенкамаце. Мы позна прыехалі, а потым я вырашыў паехаць да бацькі парыбаліць».
19 сакавіка 2025 года яго памілавалі і выдварылі з краіны. Цяпер хлопцу 21 год. Мікіта — хворы на эпілепсію. Ён паведаміў, што яшчэ за тры дні да вызвалення знаходзіўся пад кропельніцай, а вызвалілі яго проста з ШІЗА.
Цяпер чытаюць
Дастаўшчык ежы «Яндэкс» у Маскве заспяваў на вуліцы і стаў зоркай — ім аказаўся хлопец з Брэста1
Каментары